Vikas Dubey Encounter | തെറ്റുകള്‍ ചെയ്തു; ഗുണ്ടാത്തലവൻ വികാസ് ദുബെ അര്‍ഹിച്ച വിധിയെന്ന് ഭാര്യ

ലക്നൗ: തന്‍റെ ഭർത്താവ് തെറ്റുകളാണ് ചെയ്തതെന്ന് ഈ വിധി അര്‍ഹിക്കുന്നുവെന്നും യുപിയിൽ കൊല്ലപ്പെട്ട ഗുണ്ടാത്തലവൻ വികാസ് ദുബെയുടെ ഭാര്യ.

കാൻപുരിലെ ഒരു ഗ്രാമത്തിലെ റെയ്ഡിനിടെ എട്ട് പൊലീസുകാരെ വെടിവച്ചു കൊലപ്പെടുത്തിയ കേസിലെ മുഖ്യപ്രതിയായിരുന്നു വികാസ് ദുബെ.

പൊലീസ് കസ്റ്റഡിയിൽ നിന്ന് രക്ഷപ്പെടാൻ ശ്രമിക്കുന്നതിനിടെ കഴിഞ്ഞ ദിവസം ഇയാൾ പൊലീസ് എന്‍കൗണ്ടറിൽ കൊല്ലപ്പെട്ടിരുന്നു. ഇതിന്‍റെ പശ്ചാത്തലത്തിലാണ് ഭാര്യയായ റിച്ചയുടെ പ്രതികരണം.

ഭർത്താവ് ഇങ്ങനെയൊരു മരണം അർഹിക്കുന്നോയെന്ന് മാധ്യമപ്രവർത്തകർ റിച്ചയോട് ചോദിച്ചിരുന്നു.. 'തീർച്ചയായും.. വികാസ് തെറ്റുകളാണ് ചെയ്തത്. ഇങ്ങനെയൊരു വിധി തന്നെയാണ് അർഹിക്കുന്നത്' എന്നായിരുന്നു മറുപടി. (ചിത്രം: വികാസ് ദുബെ കൊല്ലപ്പെട്ട സ്ഥലം)

ഭൈരഘോട്ടില്‍ കനത്ത പൊലീസ് സുരക്ഷയിലായിരുന്നു ദുബെയുടെ സംസ്കാര ചടങ്ങുകൾ നടന്നത്. ഇയാളുടെ സഹോദരി ഭർത്താവ് ദിനേഷ് തിവാരിയാണ് അന്ത്യകര്‍മ്മങ്ങൾ ചെയ്തതെന്നാണ് പൊലീസ് അറിയിച്ചത്. ( ചിത്രം: വികാസ് ദുബെ കൊല്ലപ്പെട്ട സ്ഥലം)

ദുബെയുടെ മരണാനന്തര ചടങ്ങുകളിൽ നിന്ന് പിതാവായ രാം കുമാർ വിട്ടു നിന്നിരുന്നു. പൊലീസ് ചെയ്തത് ശരിയായ കാര്യമാണെന്നായിരുന്നു എന്‍കൗണ്ടർ നടപടിയെ പിന്തുണച്ച് അദ്ദേഹം പ്രതികരിച്ചത്

അന്ത്യകര്‍മ്മങ്ങൾക്ക് സാക്ഷ്യം വഹിക്കാൻ വികാസിന്‍റെ ഭാര്യയും മകനും എത്തിയിരുന്നു. ഇതിനിടെ റിച്ച മാധ്യമപ്രവർത്തകരോട് ഇറങ്ങിപ്പോകാൻ പറഞ്ഞതായും റിപ്പോർട്ടുകളുണ്ട്. മാധ്യമങ്ങളാണ് വികാസിന്‍റെ മരണത്തിന് ഉത്തരവാദിയെന്ന് ഇവർ ആരോപിച്ചുവെന്നാണ് പറയപ്പെടുന്നത്. ( ചിത്രം: വികാസ് ദുബെ കൊല്ലപ്പെട്ട സ്ഥലം)

അന്ത്യകര്‍മ്മങ്ങൾക്ക് ശേഷം റിച്ചയെയും മകനെയും പൊലീസ് അജ്ഞാത കേന്ദ്രത്തിലേക്ക് മാറ്റിയിട്ടുണ്ട്. ഇവരെ എങ്ങോട്ടാണ് മാറ്റിയതെന്ന് വെളിപ്പെടുത്താന്‍ ഉദ്യോഗസ്ഥർ തയ്യാറായിട്ടില്ല. (ചിത്രം: വികാസ് ദുബെ കൊല്ലപ്പെട്ട സ്ഥലം)