40,000 കോടി രൂപയുടെ കേന്ദ്രഫണ്ട് തിരികെ നൽകാനാണ് ഫഡ്നാവിസ് മുഖ്യമന്ത്രിയായതെന്ന് ഹെഗ്ഡെ

ബംഗളൂരു: ശിവസേനയുടെ നേതൃത്വത്തിൽ കോൺഗ്രസ് - എൻസിപി സഖ്യസർക്കാർ സർക്കാർ രൂപീകരിക്കാനിരിക്കെ ബിജെപി നേതാവ് ദേവേന്ദ്ര ഫഡ്നാവിസ് തിരക്കിട്ട് സത്യപ്രതിജ്ഞ ചെയ്തത് കേന്ദ്രഫണ്ട് തിരികെ നൽകാനായിരുന്നെന്ന് ബിജെപി നേതാവും എംപിയുമായ അനന്ത് കുമാര്‍ ഹെഗ്‌ഡെ.

ആവശ്യത്തിന് ഭൂരിപക്ഷമില്ലായിട്ടും തിരക്കിട്ട് സത്യപ്രതിജ്ഞ ചെയ്ത് ബിജെപി അധികാരത്തിലേറിയത് 40, 000 കോടി രൂപയുടെ കേന്ദ്രഫണ്ട് ദുരുപയോഗം തടയുക എന്ന ലക്ഷ്യത്തോടെ ആയിരുന്നെന്നും അദ്ദേഹം പറഞ്ഞു.

തിരക്കിട്ട് സത്യപ്രതിജ്ഞ ചെയ്ത് അധികാരത്തിൽ എത്തിയ ദേവേന്ദ്ര ഫഡ്നാവിസ് 80 മണിക്കൂറോളമാണ് മുഖ്യമന്ത്രി പദവിയിൽ ഇരുന്നത്. എന്നാൽ 40,000 കോടി രൂപയുടെ കേന്ദ്രഫണ്ട് തിരികെ കേന്ദ്രസർക്കാരിന് കൈമാറുന്നതിന് 15 മണിക്കൂർ മതിയായിരുന്നെന്നും അദ്ദേഹം പറഞ്ഞു.

40,000 കോടി രൂപയുടെ കേന്ദ്രഫണ്ട് സംരക്ഷിക്കുന്നതിന് വേണ്ടി ബി ജെ പി നടത്തിയ നാടകമായിരുന്നു പെട്ടെന്നുള്ള സത്യപ്രതിജ്ഞാ ചടങ്ങ്. അതേസമയം, ഹെഗ്ഡെയുടെ പ്രസ്താവനയെ ദേവേന്ദ്ര ഫഡ്നാവിസ് നിഷേധിച്ചു. മുഖ്യമന്ത്രിയായിരുന്ന സമയത്ത് അത്തരത്തിലുള്ള പ്രധാനപ്പെട്ട തീരുമാനങ്ങളൊന്നും എടുത്തിട്ടില്ലെന്നും ആരോപണങ്ങൾ തെറ്റാണെന്നും അദ്ദേഹം പറഞ്ഞു.