Exit Poll Effect:സോണിയയുമായുള്ള കൂടിക്കാഴ്ച മായാവതി റദ്ദാക്കി; പ്രതിപക്ഷ നീക്കങ്ങളെ പ്രതിസന്ധിയിലാക്കി എക്സിറ്റ് പോൾ

ന്യൂഡൽഹി: എക്സിറ്റ് പോൾ ഫലങ്ങൾ പ്രതിപക്ഷത്തിന്റെ ബദൽ സർക്കാർ ശ്രമങ്ങൾക്ക് മേൽ കരിനിഴൽ വീഴ്ത്തി. രാഹുൽ ഗാന്ധിയുമായും സോണിഗാന്ധിയുമായും നടത്താനിരുന്ന കൂടികാഴ്ച ബിഎസ്പി നേതാവ് മായാവതി റദ്ദാക്കി. ചന്ദ്രബാബു നായിഡുവിന്റെ നേതൃത്വത്തിൽ നാളെ നടത്താൻ ആലോചിച്ച യോഗം ഉപേക്ഷിച്ചു. ബിജെപി ഇതര സർക്കാർ രൂപീകരണത്തിനായുള്ള ഔപചാരിക ചർച്ചകൾ  ഫലം വന്ന ശേഷം മതിയെന്ന് പ്രതിപക്ഷ പാർട്ടികളുടെ പുതിയ തീരുമാനം. അതേസമയം മുൻനിശ്ചയിച്ച് യോഗങ്ങളുമായി എൻഡിഎ മുന്നോട്ട് തന്നെ. നാളെ എൻഡിഎ ഘടകക്ഷികൾ ഡൽഹിയിൽ യോഗം ചേരും.

ആശങ്കയിലാണ് പ്രതിപക്ഷം. എക്സിറ്റ് പോൾ പ്രവചനങ്ങൾ ഫലിച്ചാലും ഇല്ലെങ്കിലും പ്രതിപക്ഷത്തെ ആങ്കയിലാക്കാൻ ഇതിന് കഴിഞ്ഞു. ബിജെപി ഇതര സർക്കാർ രൂപീകരണ ശ്രമങ്ങളുടെ വേഗം കുറഞ്ഞു. ഇതിനായുള്ള കൂടികാഴ്ചകൾ റദ്ദാക്കപ്പെട്ടു. ഇനി ഔദ്ദ്യോഗിക ചർച്ചകൾ തിരഞ്ഞെടുപ്പ് ഫലം വന്ന ശേഷം മാത്രം. അതായത് ഫലം വന്ന് ഓരോ പാർട്ടിയുടെയും അംഗബലം ഉറപ്പിച്ച ശേഷം മാത്രം.

ബിഎസ്പി അധ്യക്ഷ മായവതിയുടെയും പശ്ചിമ ബംഗാൾ മുഖ്യമന്ത്രി മമത ബാനർജിയുമാണ് ഈ നിലപാട് സ്വീകരിച്ചത്. ഇതിന്റെ ഭാഗമായി കോൺഗ്രസ് അധ്യക്ഷൻ രാഹുൽ ഗാന്ധി, യു പി എ ചെയർ പേഴ്സൻ സോണിയ ഗാന്ധി എന്നിവരുമായുള്ള കൂടിക്കാഴ്ചയിൽ നിന്ന് മായാവതി പിന്മാറി. എക്സിറ്റ് പോൾ ഫലങ്ങൾ കണക്കിൽ എടുക്കാതെ ഫലം വരുന്നത് വരെ കാത്തിരിക്കൂവെന്ന് സിപിഎം ജനറൽ സെക്രട്ടറി സീതാറാം യച്ചൂരി നിർദ്ദേശിച്ചു.

ആന്ധ്രാ മുഖ്യമന്ത്രി ചന്ദ്രബാബു നായിഡു, ശരദ് പവാർ എന്നിവരാണ് പ്രതിപക്ഷത്തെ ചർച്ചകൾക്ക് നേതൃത്വം നൽകുന്നത്. ഇതിൽ ചന്ദ്രബാബു നായിഡു ചർച്ചകളുടെ വേഗം കുറച്ചപ്പോൾ ശരത് പവാർ, വൈ എസ് ആർ കോൺഗ്രസ് നേതാവ് ജഗൻ മോഹൻ റെഡ്ഢിയുമായി ടെലിഫോണിൽ ചർച്ച നടത്തി. മായാവതി അഖിലേഷ് യാദവുമായും  കൂടികഴ്ച നടത്തി. 

ബിജെപി ഏറ്റവും വലിയ ഒറ്റകക്ഷിയാകാതെ അനിശ്ചിതത്വം ഉണ്ടായാൽ അവസരം മുതലെടുക്കണമെന്നാണ് പ്രതിപക്ഷത്തെ പൊതു അഭിപ്രായം. അതിനായി ഏറ്റവും വലിയ ഒറ്റകക്ഷിയെ സർക്കാർ രൂപീകരണത്തിന് ക്ഷണിക്കരുതെന്ന ആവശ്യവുമായി രാഷ്ട്രപതിയെ കാണുന്നതും പരിഗണനയിലുണ്ട്. 

അതേസമയം എൻഡിഎ ക്യാമ്പ് തികഞ്ഞ ആത്മവിശ്വാസത്തിലാണ്. കക്ഷി നേതാക്കൾക്ക് ബിജെപി അധ്യക്ഷൻ അമിത്ഷാ നാളെ ഉച്ച ഭക്ഷണ വിരുന്നൊരുക്കിയിട്ടുണ്ട്. കേന്ദ്ര മന്ത്രി സഭാ യോഗവും നാളെ ചേരും.