ജബൽപുർ: അയോധ്യ വിധി പ്രഖ്യാപിച്ച ദിവസം ഡ്യൂട്ടി സമയത്ത് വാട്സാപ്പിലൂടെ ചാറ്റ് ചെയ്ത അഞ്ച് പൊലീസുകാർക്ക് സസ്പെൻഷൻ. മധ്യപ്രദേശിലെ ജബൽപുരിലാണ് സംഭവം. അയോധ്യവിധിയുമായി ബന്ധപ്പെട്ട് പ്രശ്നബാധിത മേഖലകളിൽ ഡ്യൂട്ടി നിയോഗിച്ച പൊലീസുകാരെയാണ് കൃത്യവിലോപത്തിന്‍റെ പേരിൽ സസ്പെൻഡ് ചെയ്തത്.
ജബൽപുർ എസ്.പി അമിത് സിങ് നടത്തിയ മിന്നൽ പരിശോധനയിലാണ് പൊലീസുകാർ വാട്സാപ്പിൽ ചാറ്റ് ചെയ്യുന്നതായി കണ്ടെത്തിയത്. അഞ്ചുപേരെയും ഉടൻ സസ്പെൻഡ് ചെയ്യണമെന്ന ശുപാർശ എസ്.പി നേരിട്ട് പൊലീസ് മേധാവിക്ക് നൽകുകയായിരുന്നു. ശനിയാഴ്ച രാത്രിയോടെ സസ്പെൻഷൻ ഉത്തരവ് ഇറങ്ങുകയും ചെയ്തു.
അയോധ്യ കേസിൽ വിധി വരുന്നതിന്‍റെ പശ്ചാത്തലത്തിൽ ജബൽപുർ നഗരത്തിന്‍റെ വിവിധ ഭാഗങ്ങളിലായി 2500 പൊലീസുകാരെ സുരക്ഷയ്ക്കായി നിയോഗിച്ചിരുന്നു. സുരക്ഷ ശക്തമാക്കുന്നതിന്‍റെ ഭാഗമായി 25 താൽക്കാലിക പൊലീസ് ഔട്ട്പോസ്റ്റുകളും ജബൽപുരിൽ സ്ഥാപിച്ചിരുന്നു.
