LockDown4.0| 12 സംസ്ഥാനങ്ങളിലെ 30 മേഖലകളില്‍ കടുത്ത നിയന്ത്രണങ്ങളെന്ന് സൂചന

ന്യൂഡൽഹി: രാജ്യത്തെ നാലാംഘട്ട ലോക്ക് ഡൗണിൽ 12 സംസ്ഥാനങ്ങളിലെ 30 മുനിസിപ്പാലിറ്റി ഏരിയകളിൽ കടുത്ത നിയന്ത്രണങ്ങൾ ഉണ്ടായേക്കുമെന്ന് സൂചന. രാജ്യത്ത് കോവിഡ് 19 ബാധിച്ചവരുടെ എണ്ണം 85,000 കടന്ന് ചൈനയെ മറികടന്നിരിക്കുകയാണ്.

മഹാരാഷ്ട്ര, തമിഴ്നാട്, ഗുജറാത്ത്, ഡൽഹി, മധ്യപ്രദേശ്, പശ്ചിമ ബംഗാൾ, രാജസ്ഥാൻ, ഉത്തർപ്രദേശ്, തെലങ്കാന, ആന്ധ്ര പ്രദേശ്, പഞ്ചാബ്, ഒഡിഷ എന്നീ സംസ്ഥാനങ്ങളിലെ 30 മുനിസിപ്പാലിറ്റി ഏരിയകളിലാണ് നിയന്ത്രണങ്ങൾ.

നിയന്ത്രണങ്ങളുമായി ബന്ധപ്പെട്ട പദ്ധതികൾ തയ്യാറാക്കുന്നതിന് കേന്ദ്ര ആരോഗ്യ സെക്രട്ടറി ഈ സംസ്ഥാനങ്ങളിലെ മെഡിക്കൽ ഓഫീസർമാരുമായി ചർച്ച നടത്തും.

ഗ്രേറ്റർ മുംബൈ, ഗ്രേറ്റർ ചെന്നൈ, അഹമ്മദാബാദ്, താനെ, ഡൽഹി, ഇൻഡോർ, പൂനെ, കൊൽക്കത്ത, ജയ്പൂർ, നാസിക്, ജോധ്പൂർ, ആഗ്ര, തിരുവള്ളൂർ, ഔറംഗാബാദ്, കുഡ്ഡലൂർ, ഗ്രേറ്റർ ഹൈദരാബാദ്, സൂററ്റ്, ചെങ്കൽപേട്ട്, അരിയലൂർ, ഹൗറ, കുർനൂൾ, ഭോപ്പാൽ, അമൃത്സർ, വില്ലുപുരം, വഡോദര, ഉദയ്പൂർ, പൽഘർ, ബെർഹാംപൂർ, സോലാപൂർ, മീററ്റ് എന്നിവയാണ് കടുത്ത നിയന്ത്രണങ്ങൾ വരാൻ പോകുന്ന മുനിസിപ്പാലിറ്റി ഏരിയകൾ.

നാലാംഘട്ട ലോക്ക്ഡൗണിനായിട്ടുള്ള മാർഗനിർദേശങ്ങൾ ഞായറാഴ്ച പുറത്തിറക്കും. നാലാംഘട്ടലോക്ക് ഡൗൺ വേറിട്ടതായിരിക്കുമെന്ന് തിങ്കളാഴ്ച രാജ്യത്തെ അഭിസംബോധന ചെയ്യവെ പ്രധാനമന്ത്രി നരേന്ദ്രമോദി വ്യക്തമാക്കിയിരുന്നു.

കൊറോണ വൈറസ് വ്യാപനത്തിന്റെ പശ്ചാത്തലത്തിൽ മാർച്ച് 24നാണ് രാജ്യത്ത് ലോക്കഡൗൺ പ്രഖ്യാപിച്ചത്. 21 ദിവസത്തേക്കായിരുന്നു ലോക്ക്ഡൗൺ. ആദ്യം മെയ് മൂന്നുവരെയും വീണ്ടും മെയ് 17 വരെയും ഇത് നീട്ടി.