Covid 19 | അമിത് ഷായുടെ ഇടപെടൽ; ഡൽഹി സ്വകാര്യ ആശുപത്രികളിലെ കോവിഡ് ചികിത്സാനിരക്ക് മൂന്നിലൊന്നായി കുറഞ്ഞു

കേന്ദ്ര ആഭ്യന്തരന്ത്രി അമിത് ഷായുടെ നേതൃത്വത്തിലാണ് നീതി ആയോഗ് അംഗമായ വി.കെ പോളിന്‍റെ നേതൃത്വതതിൽ സമിതി രൂപീകരിച്ചത്. ഡൽഹിയിലെ കോവിഡ് -19 രോഗികൾക്ക് ആശ്വാസം പകരുന്ന രീതിയിലാണ് സ്വകാര്യ ആശുപത്രികളിലെ നിരക്ക് പുനഃക്രമീകരിച്ചത്.

വെന്റിലേറ്റർ ഇല്ലാത്ത ഐസിയു കിടക്കകൾക്ക് നിലവിൽ 34,000-43,000 രൂപയാണ് ഈടാക്കിയിരുന്നത്. ഇതിനുപകരം 13,000-15,000 രൂപ ഈടാക്കനാണ് സമിതിയുടെ നിർദേശം. വെന്റിലേറ്ററുകളുള്ള ഐസിയു കിടക്കകളുടെ നിരക്ക് 15,000-18,000 രൂപയായി കണക്കാക്കണമെന്ന് കമ്മിറ്റി ശുപാർശ ചെയ്തു, നിലവിൽ ഇത് 44,000-54,000 രൂപയാണ്.

പിപിഇ കിറ്റുകളുടെ വില ഉൾപ്പടെ കുറവ് വരുത്താനാണ് നിർദേശം. അതേസമയം ഇതുസംബന്ധിച്ച അന്തിമ ഉത്തരവ് ഡൽഹി സർക്കാർ പുറപ്പെടുവിക്കുമെന്ന് ആഭ്യന്തര മന്ത്രാലയത്തിലെ ഉദ്യോഗസ്ഥർ സിഎൻഎൻ-ന്യൂസ് 18 നോട് പറഞ്ഞു.

ഡൽഹി സർക്കാർ ശുപാർശകൾ അംഗീകരിക്കുകയാണെങ്കിൽ, സ്വകാര്യ ആശുപത്രികളിലെ കോവിഡ് -19 രോഗികൾക്കായി മാറ്റിവെക്കുന്ന 60% കിടക്കകൾക്കാണ് പുതിയ നിരക്ക് നടപ്പിലാക്കുക.

സ്വകാര്യ ആശുപത്രികൾ കോവിഡ് -19 കിടക്കകളുടെ 60% സബ്‌സിഡിയുള്ളവരുടെ ചികിത്സയ്ക്കായി നീക്കിവെക്കുമെന്ന് ഡൽഹി മുഖ്യമന്ത്രി അരവിന്ദ് കെജ്‌രിവാളുമായും ലഫ്റ്റനന്‍റ് ഗവർണർ അനിൽ ബൈജലുമായും കൂടിക്കാഴ്ച നടത്തിയശേഷം ആഭ്യന്തരമന്ത്രി അമിത് ഷാ ഞായറാഴ്ച അറിയിച്ചിരുന്നു.