പ്രവാസി ഭാരതീയ കേന്ദ്രം ഉൾപ്പെടെ 2 കേന്ദ്ര സ്ഥാപങ്ങൾ ഇനി സുഷമ സ്വരാജിന്റെ പേരിൽ അറിയപ്പെടും

ന്യൂഡല്‍ഹി: പ്രവാസി ഭാരതീയ കേന്ദ്രം എന്ന സാംസ്കാരിക കേന്ദ്രത്തിന് അന്തരിച്ച  മുൻ കേന്ദ്രമന്ത്രി സുഷമ സ്വരാജിന്റെ പേര് നൽകി. വിദേശകാര്യമന്ത്രി എസ് ജയ്ശങ്കര്‍, മന്ത്രാലയ വക്താവ് രവീഷ് കുമാര്‍ എന്നിവര്‍ ട്വിറ്ററിലൂടെ ഇക്കാര്യം കഴിഞ്ഞ ദിവസം വ്യക്തമാക്കിയിരുന്നു. നയതന്ത്ര വിദഗ്ധർക്ക് പരിശീലനം നൽകുന്ന ഡല്‍ഹിയിലെ ഫോറിന്‍ സര്‍വീസ് ഇന്‍സ്റ്റിറ്റ്യൂട്ടിന്റെ പേരും സുഷമ സ്വരാജ് ഇന്‍സ്റ്റിറ്റ്യൂട്ട് ഓഫ് ഫോറിന്‍ സര്‍വീസ് എന്നാക്കി മാറ്റി.

2014 മുതല്‍ 2019 വരെ മന്ത്രിയായിരിക്കെ വിദേശകാര്യമന്ത്രാലയത്തിന് മാനുഷിക മുഖം നല്‍കിയതിലൂടെ സുഷമ സ്വരാജ് ശ്രദ്ധനേടിയിരുന്നു. ട്വിറ്ററിലൂടെ ജനങ്ങളുടെ പ്രശ്‌നങ്ങള്‍ അടിയന്തരമായി പരിഹരിച്ച് വിദേശകാര്യ മന്ത്രാലയത്തെ അവര്‍ ജനകീയമാക്കി.

ഇന്ത്യൻ നയതന്ത്രത്തിന് സ്വരാജ് നൽകിയ വിലമതിക്കാനാവാത്ത സംഭാവനയും പൊതുസേവനത്തിന്റെ ധാർമ്മികതയും കണക്കിലെടുത്താണ് രണ്ട് സ്ഥാപനങ്ങളുടെയും പേരുമാറിയതെന്ന് വിദേശകാര്യ മന്ത്രാലയം പ്രസ്താവനയിൽ പറഞ്ഞു.

1977 ല്‍ തന്റെ 25-ാം വയസില്‍ ഹരിയാണയിലെ ക്യാബിനറ്റ് മന്ത്രിസ്ഥാനത്ത് എത്തിയ അവര്‍ സംസ്ഥാനത്ത് ആ സ്ഥാനത്തെത്തുന്ന ഏറ്റവും പ്രായംകുറഞ്ഞ വ്യക്തിയായി മാറി. 2019 ഓഗസ്റ്റ് ആറിനാണ് ഹൃദയാഘാതത്തെ തുടര്‍ന്ന് മരിച്ചത്.

ആഗോളതലത്തിൽ ട്വിറ്ററിൽ ഏറ്റവും കൂടുതൽ പിന്തുടരുന്ന വിദേശകാര്യ മന്ത്രിമാരിൽ ഒരാളായിരുന്നു സ്വരാജ്. ട്വിറ്ററിൽ സഹായത്തിനായി വിളിക്കുന്നതിനോട് പെട്ടെന്ന് പ്രതികരിക്കുന്നതിനാൽ വിദേശത്ത് കുടുങ്ങിക്കിടക്കുന്ന പല ഇന്ത്യക്കാരെയും അവർ നാട്ടിലെത്തിച്ചിട്ടുണ്ട്. 68-ാം ജന്മവാർഷികത്തിന് ഒരു ദിവസം മുൻപാണ് സ്വരാജിന് ശേഷം രണ്ട് സ്ഥാപനങ്ങളുടെയും പേര് നൽകാനുള്ള സർക്കാർ തീരുമാനം.