കൊറോണയെ തുരത്താൻ ഗോമൂത്രവുമായി ഹിന്ദുമഹാസഭ; വേണമെങ്കിൽ ട്രമ്പിനും കൊടുക്കും

ഡൽഹി: കോവിഡ് - 19   വൈറസ് ലോകമെമ്പാടും പടരുമ്പോൾ വ്യാജ വാർത്തകളും നുണപ്രചാരണങ്ങളും അതോടൊപ്പം പ്രചരിക്കുന്നുണ്ട്. ലോകാരോഗ്യ സംഘടനയും  വൈദ്യ ശാസ്ത്ര മേഖലയും വൈറസ് തടയാൻ പോംവഴി തേടുമ്പോൾ വൈറസ് ചെറുക്കാനാകുമെന്ന അവകാശവാദവുമായി പലരും രംഗത്തെത്തുന്നുണ്ട്. ഇപ്പോഴിതാ കൊറോണയെ തുരത്താൻ ഗോമൂത്ര പാർട്ടി സംഘടിപ്പിച്ചിരിക്കുകയാണ് അഖില ഭാരത ഹിന്ദുമഹാ സഭ.

അഖില ഭാരത ഹിന്ദു മഹാസഭയുടെ ഡൽഹിയിലെ ദേശീയ ആസ്ഥാനത്തായിരുന്നു ഗോ മൂത്ര പാർട്ടി.

ജൻ ജാഗരൺ മഞ്ചും യൂത്ത് സനാതൻ സേവ സംഘും ഗോ മൂത്ര പാർട്ടിയുടെ ഭാഗമായി.ഹിന്ദു മഹാസഭ ദേശിയ അധ്യക്ഷൻ  സ്വാമി ചക്രപാണി മഹാരാജയുടെ നേതൃത്യത്തിലായിരുന്നു പരിപാടി.

പശുവിന്റെ മൂത്രം കുടിച്ചാൽ കോവിഡ്- 19 വൈറസ് പിടിപെടില്ലെന്നാണ് സ്വാമിയുടെ അവകാശവാദം.

പുരാതന കാലങ്ങളിൽ വായു ശുദ്ധീകരിക്കാനും അണുക്കളെ നശിപ്പിക്കാനും  സന്യാസിമാർ പശുവിന്റെ മൂത്രവും  ചാണകവും  പ്രയോഗിച്ചിരുന്നതായി ഇവർ പറയുന്നു.

ഇന്ത്യയിൽ മാത്രമല്ല വിദേശ രാജ്യങ്ങളും പശുവിന്റെ  മൂത്രത്തിന്റെ ഔഷധഗുണം തിരിച്ചറിയുമെന്നാണ് സംഘാടകരുടെ അവകാശവാദം.

വേണ്ടിവന്നാൽ അമേരിക്കയിലേക്ക് ഗോമൂത്രം കയറ്റിയയക്കാൻ പോലും സംഘാടകർ തയ്യാറാണ്.അമേരിക്കൻ പ്രസിഡന്റ് ഡൊണാൾഡ് ട്രംപിന് ഗോമൂത്രം അയച്ചു നൽകുമെന്നും സ്വാമി ചക്രപാണി മഹാരാജ പറഞ്ഞു.

ആവശ്യക്കാർക്ക് സൗജന്യമായി ഗോ മൂത്രം എത്തിച്ചു നൽകും. സംസ്ഥാനങ്ങൾ തോറും ഗോമൂത്ര പാർട്ടി നടത്തുമെന്നും ഹിന്ദുമഹാ സഭാ  പറഞ്ഞു.

ഹിന്ദു മഹാസഭ കേരള അധ്യക്ഷൻ സ്വാമി ധത്രയെ സായി സ്വരൂപനാന്ദയും പരിപാടിക്കെത്തിയിരുന്നു.

ദോഷം പറയരുതല്ലോ. വാർത്ത റിപ്പാർട്ട് ചെയ്യാനെത്തിയ മാധ്യമ പ്രവർത്തകരും സംഘാടകരുമൊഴിച്ച് മറ്റാരേയും പാർട്ടിക്ക് കണ്ടില്ല.