കുട്ടികള്‍ക്കുള്ള ഉച്ചഭക്ഷണ പദ്ധതി പ്രകാരം സ്കൂളിലെത്തിയത് 'കാലിത്തീറ്റ'; സംഭവം മഹാരാഷ്ട്രയിൽ

പൂനെ: കുട്ടികൾക്കായുള്ള ഉച്ചഭക്ഷണ പദ്ധതി പ്രകാരം സ്കൂളുലെത്തിച്ചു നൽകിയത് 'കാലിത്തീറ്റ'. മഹാരാഷ്ട്ര പൂനെയിലെ ഒരു സർക്കാർ സ്കൂളുകളിലാണ് ഉച്ചഭക്ഷണത്തിനായുള്ള ധാന്യത്തിന് പകരം കാലിത്തീറ്റ എത്തിയത്. സർക്കാർ ഉടമസ്ഥതയിലുള്ള ഈ സ്കൂളിന്‍റെ നടത്തിപ്പ് ചുമതല പൂനെ മുൻസിപ്പൽ കോർപ്പറേഷനാണ്.

കോവിഡ്-ലോക്ക് ഡൗൺ പശ്ചാത്തലത്തിൽ സ്കൂളുകൾ അടച്ചിട്ടിരിക്കുന്ന സാഹചര്യത്തിൽ കുട്ടികൾക്കുള്ള ഉച്ചഭക്ഷണം വീടുകളിലെത്തിച്ച് നൽകാൻ മഹാരാഷ്ട്ര സർക്കാർ നിർദേശം നല്‍കിയിട്ടുണ്ട്. സർക്കാർ സ്കൂളുകളിലെ കുട്ടികള്‍ക്ക് ഇത് വീടുകളിലെത്തിച്ച് നൽകണ്ട ചുമതല ജില്ലാഭരണകൂടത്തിനാണ്. ഇതിന്‍റെ ഭാഗമായി പൂനെയിലെ സ്കൂൾ നമ്പർ 58ൽ എത്തിയ ഭക്ഷ്യസാധനങ്ങളുടെ ലോഡിലാണ്  കാലിത്തീറ്റയുണ്ടായിരുന്നത്. (ചിത്രം- ANI)

പ്രാദേശിക പ്രവർത്തകരുടെ ഇടപെടലിനെ തുടർന്നാണ് വിവരം പുറത്തറിയുന്നത്. പരാതിയുടെ അടിസ്ഥാനത്തിൽ സ്ഥലത്തെത്തിയ ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) അധികൃതർ കാലിത്തീറ്റ പാക്കറ്റുകൾ പിടിച്ചെടുത്തിട്ടുണ്ട്.  ( ചിത്രം- ANI)

മഹാരാഷ്ട്ര സർക്കാരിന്‍റെ ഉച്ചഭക്ഷണ പദ്ധതിയിൽ ഉൾപ്പെട്ട സ്കൂളാണിതെന്നാണ് വിഷയത്തിൽ പൂനെ മേയർ മുരളീധർ മൊഹോലിന്‍റെ പ്രതികരണം. എത്തിച്ചു നൽകുന്ന ഭക്ഷ്യവസ്തുക്കൾ വിതരണം ചെയ്യുക എന്ന ചുമതല മാത്രമെ മുൻസിപ്പൽ കോർപ്പറേഷന് ഉള്ളു എന്നും അദ്ദേഹം കൂട്ടിച്ചേർത്തു.  ( ചിത്രം- ANI)

'കുട്ടികള്‍ക്ക് ഉച്ചഭക്ഷണത്തിനായി കാലിത്തീറ്റ എത്തിച്ചു നൽകിയത് ദൗർഭാഗ്യകരമായ സംഭവം തന്നെയാണ്. സംഭവത്തിൽ വിശദമായ അന്വേഷണം വേണമെന്നാണ് ഞങ്ങൾ ആവശ്യപ്പെടുന്നത്. കുറ്റക്കാരെന്ന് കണ്ടെത്തുന്നവർക്ക് തക്കശിക്ഷയും നൽകണം' മേയർ വ്യക്തമാക്കി.  ( ചിത്രം- ANI)