ശബരിമല: വിശാല ബെഞ്ച് നിയമപരമോ? വിധി തിങ്കളാഴ്ച

ശബരിമല യുവതീ പ്രവേശനം ഉള്‍പ്പെടെയുള്ള വിഷയങ്ങള്‍ പരിഗണിക്കുന്ന ഭരണഘടനാ ബെഞ്ചിന്റെ സാധുത സംബന്ധിച്ച് തിങ്കളാഴ്ച്ച സുപ്രീം കോടതി വിധി പറയും. വിശാലബെഞ്ച് രൂപീകരിച്ചത് നിയമപ്രകാരമല്ലെന്ന മുതിര്‍ന്ന അഭിഭാഷകരുടെ പരാതിയിലാണ് കോടതി വിധി പറയുന്നത്. പരിഗണനാ വിഷയങ്ങൾ തിങ്കളാഴ്ച തീരുമാനിക്കുമെന്ന ചീഫ് ജസ്റ്റിസിന്റെ വാക്കാലുള്ള പരാമർശം വിശാല ബഞ്ച് നിലനിൽക്കുമെന്ന സൂചനയാണ് നൽകുന്നത്.

ശബരിമല വിധി പുനപ്പരിശോധിക്കണമെന്ന ഹർജി പരിഗണിച്ച അഞ്ചംഗ ബെഞ്ച് വിശാലബെഞ്ചിന് വിട്ടതിനെ മുതിർന്ന അഭിഭാഷകർ ചോദ്യം ചെയ്തിരുന്നു. ഇതേ തുടർന്നാണ് നിയമപ്രശ്‌നത്തിൽ വിശാല ബഞ്ച് വിശദമായി വാദം കേട്ടത്.

ഒരു വിഷയം പരിഗണിക്കുമ്പോള്‍ അതുമായി ബന്ധമില്ലാത്ത വിഷയങ്ങള്‍ ഉയര്‍ന്ന ബെഞ്ചിന്റെ പരിഗണനയ്ക്കു വിടാൻ കഴിയില്ലെന്ന് മുതിർന്ന അഭിഭാഷകൾ ഫാലി എസ് നരിമാൻ വാദിച്ചു. ശബരിമലയുമായി ബന്ധപ്പെട്ട മതപരമായ വിഷയത്തിൽ കോടതി ഉത്തരം നൽകി കഴിഞ്ഞു.ആർട്ടിക്കിൾ 25, 26 മായി ബന്ധപ്പെടുത്തി ഇനി വദത്തിന്റെ ആവശ്യമില്ലെന്നും നരിമാൻ വാദിച്ചു.

പുനഃപരിശോധനാ ഹർജികൾ വിശാലബെഞ്ചിന് വിടാനാകില്ലെന്ന് കേരളം നിലപാടറിയിച്ചു. സർക്കാരിന് വേണ്ടി മുതിർന്ന അഭിഭാഷകൻ ജയ്ദീപ് ഗുപ്തയാണ് വാദിച്ചത്.

പുനഃപരിശോധനാഹര്‍ജികളല്ല വിവിധ ഹര്‍ജികളിലെ നിയമപ്രശ്നങ്ങള്‍ മാത്രമാണ് വിശാലബെഞ്ചിനു വിട്ടതെന്നായിരുന്നു കേന്ദ സർക്കാരിന് വേണ്ടി സോളിസിറ്റർ ജനറൽ തുഷാർ മേത്തയുടെ വാദം.