റാലിയിൽ പൊട്ടിക്കരഞ്ഞ് ജയപ്രദ; ആസിഡ് ആക്രമണ ഭീഷണിയുണ്ടായിരുന്നുവെന്ന് താരം

ന്യൂഡൽഹി: റാപൂറിലെ പൊതു റാലിയിൽ പൊട്ടിക്കരഞ്ഞ് ബിജെപി സ്ഥാനാർഥിയും നടിയുമായ ജയപ്രദ. തൻറെ മണ്ഡലമായ റാംപൂരിൽ മത്സരിക്കുന്നതിൽ നിന്ന് പിന്മാറാൻ സമ്മർദമുണ്ടെന്ന് ജയപ്രദ പറഞ്ഞു.

സമാജ് വാദി പാർട്ടി നേതാവ് അസംഖാനാണ് തന്നോട് ഇക്കാര്യം അവശ്യപ്പെട്ടതെന്നും ജയപ്രദ പറഞ്ഞതായി എൻഡി ടിവി റിപ്പോർട്ട് ചെയ്തിരിക്കുന്നു. റാംപൂരിൽ ഉപേക്ഷിക്കാനും രാഷ്ട്രീയം ഉപേക്ഷിക്കാനുമായിരുന്നു സമ്മർദമെന്നും അല്ലെങ്കിൽ തനിക്ക് ആസിഡ് ആക്രമണം നേരിടേണ്ടി വരുമെന്ന് ഭീഷണിപ്പെടുത്തിയതായും ജയപ്രദ പറഞ്ഞു.

ലോക്സഭ തെരഞ്ഞെടുപ്പിൽ മത്സരിക്കുന്നതിനായി നാമ നിർദേശ പത്രിക സമർപ്പിച്ച ശേഷം റാലിയിൽ സംസാരിക്കുകയായിരുന്നു അവർ. ബിജെപി പിന്നിലുള്ളതിനായി ആദ്യമായി തനിക്ക് ശക്തി തോന്നി. ഇതുപോലെ ഇനിയൊരിക്കലും കരയില്ല ജീവിക്കാനുള്ള അവകാശം എനിക്കുണ്ട്. ഞാൻ നിങ്ങളെ സേവിക്കും- ജയപ്രദ പറഞ്ഞു.

സ്ത്രീകളെ സംരക്ഷിക്കുകയും ബഹുമാനിക്കുകയും ചെയ്യുന്ന ഒരു പാർട്ടിയിൽ എത്തിയതിൽ സന്തോഷമുണ്ടെന്ന് ജയപ്രദ പറഞ്ഞു. 2004ലും 2009ലും റാംപൂരിൽ നിന്ന് സമാജ് വാദി പാർട്ടി സ്ഥാനാർഥിയായി ജയപ്രദ വിജയിച്ചിരുന്നു. 2014ൽ രാഷ്ട്രീയ ലോക് ദൾ സ്ഥാനാർഥിയായി ബിജ്നോറിൽ മത്സരിച്ചെങ്കിലും പരാജയപ്പെട്ടു. ഇത്തവണ അസംഖാനെയാണ് ജയപ്രദ നേരിടുന്നത്.