'ഹിന്ദു പാകിസ്ഥാൻ' പരാമർശം; ശശി തരൂരിന് അറസ്റ്റ് വാറണ്ട്

കൊൽക്കത്ത: വിവാദമായ 'ഹിന്ദു പാകിസ്ഥാൻ' എന്ന പരാമർശം നടത്തിയതിന് തിരുവനന്തപുരം എം.പി ശശി തരൂരിനെതിരെ കൊൽക്കത്ത കോടതി അറസ്റ്റ് വാറണ്ട് പുറപ്പെടുവിച്ചു. ബിജെപിക്ക് വോട്ട് ചെയ്തു വിജയിപ്പിച്ചാൽ അവർ ഭരണഘടന മാറ്റിയെഴുതുമെന്നും "ഹിന്ദു പാകിസ്ഥാൻ" സൃഷ്ടിക്കുന്നതിന് വഴിയൊരുക്കുമെന്നുമായിരുന്നു ശശി തരൂർ തെരഞ്ഞെടുപ്പ് പ്രചാരണവേളയിൽ പറഞ്ഞത്.

ഇതിനെതിരെ ബിജെപി നേതാവ് കൊടുത്ത പരാതിയിലാണ് ചീഫ് മെട്രോപൊളിറ്റൻ മജിസ്‌ട്രേറ്റ് (സിഎംഎം) ഇപ്പോൾ അറസ്റ്റ് വാറണ്ട് പുറപ്പെടുവിച്ചത്. കേസിൽ സെപ്റ്റംബർ 24ന് വീണ്ടും വാദം കേൾക്കും.

ജനങ്ങൾക്കിടയിൽ ശത്രുത പരത്തുന്നതാണ് തരൂരിന്‍റെ പ്രസ്താവനയെന്ന് പരാതിക്കാരൻ ആരോപിക്കുന്നു. കഴിഞ്ഞ ദിവസം കേസ് പരിഗണിച്ചപ്പോൾ തരൂരിന് വേണ്ടി ആരും ഹാജരായിരുന്നില്ല. ഇതേത്തുടർന്നാണ് അറസ്റ്റ് വാറണ്ട് പുറപ്പെടുവിച്ചത്.