Ayodhya Land Price | രാമക്ഷേത്രം യാഥാർത്ഥ്യത്തിലേക്ക്; സ്ഥലവില കൂടി അയോധ്യ, വില ഉയർന്നത് 40 ശതമാനം വരെ

അയോധ്യ: രാമക്ഷേത്ര നിർമാണത്തിനുള്ള ഭൂമി പൂജ കഴിഞ്ഞതോടെ അയോധ്യയിൽ സ്ഥലവില കുതിച്ചുയർന്നു. മുപ്പത് മുതൽ നാൽപത് ശതമാനം വരെ വർദ്ധനയാണ് ഉണ്ടായിരിക്കുന്നത്. ഒരു ചതുരശ്ര അടിക്ക് 900 രൂപയായിരുന്നു അയോധ്യയിൽ വില. എന്നാൽ, രാമക്ഷേത്രം യാഥാർഥ്യമാകാൻ പോകുന്നതോടെ വില കുത്തനെ ഉയർന്നിരിക്കുകയാണ്.

900 രൂപയായിരുന്ന ഭൂമി വില 1000 രൂപ മുതൽ 2000 രൂപയും 3000 രൂപയിൽ എത്തിയിരിക്കുകയാണ്. പുതിയതായി രാമക്ഷേത്രം പണിയുമ്പോൾ അതുമായി ബന്ധപ്പെട്ട് അടിസ്ഥാന സൗകര്യങ്ങളും പ്രഖ്യാപിക്കപ്പെട്ട് കഴിഞ്ഞതോടെയാണ് ഇവിടുത്തെ ഭൂമിവിലയും കുതിച്ചുയരുന്നത്.

ഭൂമിപൂജ കഴിഞ്ഞതോടെ ഒറ്റയടിക്കാണ് 30 ശതമാനം മുതൽ 40 ശതമാനം വരെയാണ് ഉയർന്നിരിക്കുന്നത്.

അയോധ്യയെ ഇന്ത്യയുടെ വത്തിക്കാനായി മാറ്റുമെന്നാണ് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പ്രഖ്യാപിച്ചിരിക്കുകയാണ്. മൂന്ന് നക്ഷത്ര ഹോട്ടലുകളും അന്താരാഷ്ട്ര വിമാനത്താവളവും ഉൾപ്പെടെ അയോധ്യയുടെ മുഖം തന്നെ മാറ്റാണ് ഉത്തർപ്രദേശ് സർക്കാർ ലക്ഷ്യമിടുന്നത്.

അയോധ്യയിൽ എത്തുന്നവർക്ക് നിലവിൽ ഹോട്ടൽ സൗകര്യമില്ല. ഇവിടെ എത്തുന്നവർക്ക് ഒരു ഹോട്ടൽ സൗകര്യം ആറു കിലോമീറ്റർ അകലെയുള്ള ഫെയ്സാബാദ് നഗരത്തിൽ മാത്രമാണ് ഉള്ളത്. ഇത് ഇവിടെയെത്തുന്ന സഞ്ചാരികൾക്ക് താമസസൗകര്യത്തിന് ബുദ്ധിമുട്ട് ആയിരുന്നു.

അതേസമയം, നഗരത്തിന്റെ പ്രാന്തപ്രദേശങ്ങളിൽ ഇപ്പോഴും വില ചതുരശ്ര അടിക്ക് 300 മുതൽ 450 രൂപയാണ്. രാമക്ഷേത്രത്തിനുള്ള ശില പാകിയത് പ്രധാനമന്ത്രി നരേന്ദ്ര മോദി ആയിരുന്നു. 40 കിലോയുടെ വെള്ളിശില ആയിരുന്നു പാകിയത്.