മംഗളൂരുവില്‍ കുടങ്ങിയ മലയാളി വിദ്യാര്‍ഥികളെ KSRTC ബസില്‍ കാസർകോടെത്തിക്കും; ബസ് സർവീസ് പൊലീസ് സുരക്ഷയിൽ

പൗരത്വ ഭേദഗതി നിയമത്തിനെതിരായ പ്രതിഷേധത്തെ തുടർന്ന് നിരോധനാജ്ഞ പ്രഖ്യാപിച്ച മംഗളൂരുവില്‍ കുടുങ്ങിക്കിടക്കുന്ന മലയാളി വിദ്യാര്‍ഥികളെ KSRTC ബസിൽ നാട്ടിലെത്തിക്കും.

പൊലീസ് സുരക്ഷയിൽ കാസർകോടെത്തിക്കാനാണ് സംസ്ഥാന സർക്കാർ തീരുമാനിച്ചിരിക്കുന്നത്. ഇതിന്റെ ഭാഗമായി ഇന്ന് വൈകിട്ടോടെ പമ്പെല്‍ സര്‍ക്കിളില്‍ KSRTC ബസുകളെത്തും. ബസുകളുടെ സുരക്ഷ ഉറപ്പാക്കാൻ കാസർകോട് ജില്ലാ കളക്ടർ മംഗളൂരു ജില്ലാ ഭരണകൂടവുമായി ബന്ധപ്പെട്ടിട്ടുണ്ട്.

നാട്ടിലേക്ക് പുറപ്പെടാൻ ആഗ്രഹിക്കുന്ന വിദ്യാർഥികളോട് പമ്പെല്‍ സര്‍ക്കിളില്‍ എത്താൻ ആവശ്യപ്പെടുകയും ചെയ്തിട്ടുണ്ട്. കാസർകോട് എത്തിച്ചശേഷം വിദ്യാർഥികലെ മറ്റു വാഹനങ്ങളിൽ അവരവരുടെ നാട്ടിലേക്ക് അയയ്ക്കാനാണ് ജില്ലാ ഭരണകൂടം തീരുമാനിച്ചിരിക്കുന്നത്.

ഇതിനിടെ ഇന്നു വൈകിട്ട് മൂന്ന് മുതല്‍ ആറ് മണി വരെയാണ് മംഗളൂരുവിൽ നിരോധനാജ്ഞയ്ക്ക് ഇളവ് പ്രഖ്യാപിച്ചിട്ടുണ്ട്. നാളെ പകലും ഇത് തുടരാനാണ് തീരുമാനം.