ചികിത്സയിലിരുന്ന മമതാ ബാനർജി ആശുപത്രി വിട്ടു; ഡിസ്ചാർജ് തൃണമൂൽ അധ്യക്ഷയുടെ തന്നെ നിർബന്ധപ്രകാരം

കൊൽക്കത്ത: ആക്രമണത്തിൽ പരിക്കേറ്റ് ചികിത്സയിൽ ആയിരുന്ന പശ്ചിമബംഗാൾ മുഖ്യമന്ത്രി മമതാ ബാനർജി ആശുപത്രി വിട്ടു. തൃണമൂൽ അധ്യക്ഷയുടെ തന്നെ ആവർത്തിച്ചുള്ള അഭ്യർഥന പ്രകാരം ഡിസ്ചാജ് ചെയ്യുകയായിരുന്നു ആശുപത്രി അധികൃതർ പറയുന്നത്.

നന്ദീഗ്രാമിലെ ഒരു പ്രചാരണ പരിപാടിക്കിടെയുണ്ടായ ആക്രമണത്തിലാണ് മമതയ്ക്ക് പരിക്കേറ്റത്. കണങ്കാലിന് ഗുരുതര പരിക്കേറ്റ നിലയിലാണ് ഇവരെ കൊൽക്കത്ത എസ്എസ്കെഎം ആശുപത്രിയിൽ പ്രവേശിപ്പിച്ചത്. കഴിഞ്ഞ ദിവസം രാത്രി ഏഴ് മണിയോടെയാണ് മമത ആശുപത്രി വിട്ടത്. വീൽച്ചെയറിലാണ് മമത ആശുപത്രിക്ക് പുറത്തേക്ക് വന്നത്. 

വ്യാഴാഴ്ച വൈകിട്ടോടെയാണ് ഈസ്റ്റ് മിഡ്നപുരിലെ ബിറുലിയ ബാസാറിൽ മമതയ്ക്ക് നേരെ ആക്രമണം നടന്നത്. പ്രദേശവാസികളുമായി സംവദിക്കുന്നതിനിടെ നാലഞ്ച് ആളുകൾ ചേർന്ന് ആക്രമിക്കുകയായിരുന്നു എന്നാണ് പറയപ്പെടുന്നത്. ഇടത് കണങ്കാലിലും പാദത്തിലും ഗുരുതര പരിക്കുണ്ടായിരുന്നു. അതുപോലെ വലതു തോളിനും കൈത്തണ്ടയിലും പരിക്കുകളുണ്ട്. 

'ആക്രമണ'ത്തിന്‍റെ ആഘാതത്തിലാണ് മമതയെന്നും 48 മണിക്കൂറെങ്കിലും നിരീക്ഷണത്തിൽ കഴിയേണ്ടി വരുമെന്നും ഡോക്ടർമാർ നേരത്തെ അറിയിച്ചിരുന്നു. എന്നാൽ മമതയുടെ നിർബന്ധം കാരണം നേരത്തെ തന്നെ ഡിസ്ചാർജ് ചെയ്യുകയായിരുന്നു എന്നാണ് ഡോക്ടർമാർ പറയുന്നത്.

നല്ല രീതിയിൽ വിശ്രമം വേണമെന്നാണ് ഡോക്ടർമാർ മമതയോട് ആവശ്യപ്പെട്ടിരിക്കുന്നത്. പൊതുസ്ഥലങ്ങളിൽ പങ്കെടുക്കുമ്പോൾ വീൽച്ചെയറിന്‍റെ സഹായം തേടണമെന്നും അറിയിച്ചതായാണ് റിപ്പോർട്ട്. വരുന്ന കുറച്ച് ദിവസത്തേക്ക് മമതയുടെ ആരോഗ്യസ്ഥിതി നിരീക്ഷിച്ച് വിലയിരുത്താൻ നാലംഗ ഡോക്ടർമാരുടെ മെഡിക്കൽ പാനലും സജ്ജമാക്കിയിട്ടുണ്ട്.

'48 മണിക്കൂർ ആശുപത്രിയിൽ തുടരാനാണ് നിർദേശിച്ചത്. എന്നാൽ വീട്ടിലേക്ക് പോകണമെന്ന് അവർ നിർബന്ധം പിടിക്കുകയായിരുന്നു. പൊതുചടങ്ങുകളിൽ പങ്കെടുക്കുമ്പോൾ അതീവ കരുതൽ വേണമെന്ന് നിർദേശം നല്‍കിയിട്ടുണ്ട്. ഏഴ് ദിവസങ്ങൾക്ക് ശേഷം വീണ്ടും പരിശോധന നടത്തും' മമതയുടെ ഡോക്ടർമാരിലൊരാൾ അറിയിച്ചു.

തനിക്ക് നേരെ നടന്നത് ആസൂത്രിതമായ ആക്രമണമായിരുന്നു എന്നാണ് മമത ആരോപിക്കുന്നത്. 'ഗൂഢാലോചന നടന്നിട്ടുണ്ട്.. എനിക്ക് ചുറ്റും പൊലീസുകാരില്ലാത്തതിനാൽ നന്നായി ആസൂത്രണം ചെയ്ത് തന്നെ നടപ്പാക്കിയതാണ്.. എന്നാണ് ഇവർ മാധ്യമങ്ങളോട് പറഞ്ഞത്