മമതാ ബാനർജി 48 മണിക്കൂർ നിരീക്ഷണത്തിൽ; ആഘാതം വിട്ടുമാറിയിട്ടില്ലെന്ന് ഡോക്ടർമാർ

കൊൽക്കത്ത: നന്ദീഗ്രാമിൽ വച്ചുണ്ടായ ആക്രമണത്തിൽ പരിക്കേറ്റ് ആശുപത്രിയിൽ പ്രവേശിപ്പിച്ച പശ്ചിമ ബംഗാൾ മുഖ്യമന്ത്രി മമതാ ബാനർജിയുടെ ആരോഗ്യനില സംബന്ധിച്ച് വിവരങ്ങൾ പുറത്തുവിട്ട് ഡോക്ടർമാർ. തൃണമൂൽ അധ്യക്ഷയുടെ ഇടതു കണങ്കാലിന് ഗുരുതര പരിക്ക് പറ്റിയിട്ടുണ്ടെന്നാണ് ഇവർ അറിയിച്ചിരിക്കുന്നത്.

ഇപ്പോഴും നടന്ന സംഭവത്തിന്‍റെ ആഘാതത്തിലാണ് മമതയെന്നാണ് ഡോക്ടർമാർ പറയുന്നത്. 48 മണിക്കൂർ നിരീക്ഷണത്തിൽ കഴിയേണ്ടി വരും. ഇടത് കണങ്കാലിലും പാദത്തിലും ഗുരുതര പരിക്കുണ്ട്. അതുപോലെ വലതു തോളിനും കൈത്തണ്ടയിലും പരിക്കുകളുണ്ട്. നെഞ്ചുവേദനയും ശ്വാസതടസ്സവും ഇടയ്ക്ക് ഉണ്ടാകുന്നുണ്ട്. എന്നാണ് ഡോക്ടർമാരെ ഉദ്ധരിച്ച് പുറത്തുവരുന്ന റിപ്പോർട്ട്.

കുറച്ച് പരിശോധനകൾ കൂടി ഇനിയും നടത്താനുണ്ടെന്നാണ് സൂചന. സാധരണയായി ഒന്നര-രണ്ട് മാസം വരെ വിശ്രമത്തിൽ കഴിയേണ്ടി വരുന്ന പരിക്കുകളാണ് മുഖ്യമന്ത്രിക്കുണ്ടായിരിക്കുന്നതെന്നും റിപ്പോർട്ടിൽ പറയുന്നു.

കഴിഞ്ഞ ദിവസം വൈകിട്ടോടെയാണ് ഈസ്റ്റ് മിഡ്നപുരിലെ ബിറുലിയ ബാസാറിൽ മമതയ്ക്ക് നേരെ ആക്രമണം നടന്നത്. പ്രദേശവാസികളുമായി സംവദിക്കുന്നതിനിടെ നാലഞ്ച് ആളുകൾ ചേർന്ന് ആക്രമിക്കുകയായിരുന്നു എന്നാണ് പറയപ്പെടുന്നത്. പരിക്കേറ്റ മമതയെ കൊൽക്കത്ത എസ്എസ്കെഎം ആശുപത്രിയിൽ പ്രവേശിപ്പിച്ചിരിക്കുകയാണ്.

ഇതൊരു ആസൂത്രിതമായ ആക്രമണമായിരുന്നു എന്നാണ് മമത ആരോപിക്കുന്നത്. 'ഗൂഢാലോചന നടന്നിട്ടുണ്ട്.. എനിക്ക് ചുറ്റും പൊലീസുകാരില്ലാത്തതിനാൽ നന്നായി ആസൂത്രണം ചെയ്ത് തന്നെ നടപ്പാക്കിയതാണ്.. എന്നാണ് ഇവർ മാധ്യമങ്ങളോട് പറഞ്ഞത്

അതേസമയം ആക്രമണം വ്യാജമാണെന്നാണ് ബിജെപി ആരോപിക്കുന്നത്. വോട്ട് ലഭിക്കുന്നതിനായുള്ള മമതയുടെ നാടകമാണിതെന്നാണ് സംഭവത്തിന്‍റെ ദൃശ്യങ്ങൾ അടക്കം പങ്കുവച്ച് ബിജെപി ബംഗാൾ ഘടകം പറയുന്നത്.