Disha Salian | 'ദിഷയുടെ മൃതദേഹം കണ്ടെടുക്കുന്നത് നഗ്നമായ നിലയിലല്ല; മാതാപിതാക്കള്‍ സാക്ഷി': ആരോപണങ്ങൾ തള്ളി പൊലീസ്

ബോളിവുഡ് താരം സുശാന്ത് സിംഗ് രാജ്പുതിന്‍റെ മുൻ മാനേജർ ദിഷ സാലിയാന്‍റെ മരണവുമായി ബന്ധപ്പെട്ടുയരുന്ന ആരോപണങ്ങൾ തള്ളി മുംബൈ പൊലീസ്. 

ഇക്കഴിഞ്ഞ ജൂൺ എട്ടിനാണ് മലഡിലെ ഒരു ബഹുനില കെട്ടിടത്തിൽ നിന്നും ചാടി 28കാരിയാ ദിഷ ജീവനൊടുക്കിയത്. അപകടമരണമെന്നാണ് പൊലീസ് റിപ്പോർട്ട്. എന്നാൽ സുശാന്ത് സിംഗിന്‍റെ മരണവുമായി ബന്ധപ്പെട്ട് ദുരൂഹതകൾ ഉയര്‍ന്ന സാഹചര്യത്തിൽ താരത്തിന്‍റെ മുൻ മാനേജരുടെ മരണവും സംശയങ്ങള്‍ ഉയർത്തുകയായിരുന്നു.

 മുംബൈ പൊലീസിനെതിരെ കടുത്ത വിമർശനങ്ങളാണ് ഇതുമായി ബന്ധപ്പെട്ടുയരുന്നത്. ദിഷയുടെ മരണത്തിൽ ദുരൂഹതയുണ്ടെന്നും പൊലീസ് യഥാർഥ വിവരങ്ങൾ മറച്ചു വയ്ക്കുകയാണെന്നുമായിരുന്നു മുഖ്യ ആരോപണം. ഇതിന് പുറമെ ദിഷ ബലാത്സംഗം ചെയ്യപ്പെട്ടതാണെന്നും മൃതദേഹം കണ്ടെടുത്തത് നഗ്നമായ നിലയിലായിരുന്നുവെന്നും റിപ്പോര്‍ട്ടുകളെത്തി.    

 ആ  സാഹചര്യത്തിലാണ് മുംബൈ പൊലീസ് ഇപ്പോൾ വിശദീകരണവുമായെത്തിയത്. നഗ്നമായ  നിലയിലാണ് മൃതദേഹങ്ങൾ കണ്ടെടുത്തതെന്ന വാദം പൊലീസ് നിഷേധിക്കുകയാണ്. മരണവിവരം അറിഞ്ഞ് ഉടൻ തന്നെ സംഭവ സ്ഥലത്തെത്തിയിരുന്നുവെന്നും ദിഷയുടെ മാതാപിതാക്കളും അപ്പോഴേക്കും അവിടെയുണ്ടായിരുന്നുവെന്നുമാണ് പൊലീസ് ഔദ്യോഗികപ്രസ്താവനയിലൂടെ അറിയിച്ചത്. 

ദിഷ ഗർഭിണിയായിരുന്നുവെന്നും പീഡിപ്പിക്കപ്പെട്ടിരുന്നുവെന്നുമുള്ള ആരോപണങ്ങള്‍ ഇവരുടെ കുടുംബവും നേരത്തെ തള്ളിയിരുന്നു. ദിഷയുടെ മരണവുമായി ബന്ധപ്പെട്ട് പുറത്തുവന്നിരിക്കുന്നതെല്ലാം വ്യാജ വാർത്തകളും അഭ്യൂഹങ്ങളും മാത്രമാണെന്നായിരുന്നു ഇവരുടെ പ്രതികരണം.

മകൾ മരിച്ചതിനു പിന്നാലെ അവളുടെ പ്രതിച്ഛായ തകർക്കുകയാണെന്നും മകളുടെ മരണത്തിൽ ആരെയും സംശയമില്ലെന്നും അവർ വ്യക്തമാക്കി. മുംബൈ പൊലീസിന്റെ അന്വേഷണത്തിൽ അതൃപ്തി ഇല്ലെന്നും അവർ പറഞ്ഞിരുന്നു.

ഇപ്പോൾ മാധ്യമങ്ങളും സമൂഹമാധ്യമങ്ങളും ഞങ്ങളെ കൊലപ്പെടുത്തിക്കൊണ്ടിരിക്കുകയാണ്. എല്ലാം അവസാനിപ്പിക്കണമെന്ന് ഞങ്ങൾ അഭ്യർഥിക്കുന്നു- എന്നാണ് ദിഷയുടെ അമ്മ അറിയിച്ചത്,

മാധ്യമങ്ങൾക്ക് എന്തും പറയാനുള്ള അധികാരമുള്ള പോലെ ഞങ്ങൾക്ക് ഞങ്ങളുടെ സ്വകാര്യത സംരക്ഷിക്കാനും അധികാരമുണ്ട്. ഞങ്ങളുടെ ജീവിതത്തിൽ ഇടപെടരുത്. എല്ലാവരോടുമുള്ള അഭ്യർഥനയാണ്, പൊലീസ് ഞങ്ങളോട് എല്ലാം പറഞ്ഞിട്ടുണ്ട്. കേസിലെ തെളിവുകളും പോസ്റ്റുമോർട്ടം റിപ്പോർട്ടുമെല്ലാം കാണിച്ച് തന്നിട്ടുണ്ട്. എന്റെ മകൾ ​ഗർഭിണിയായിരുന്നില്ല, അവൾ പീഡിപ്പിക്കപ്പെട്ടിട്ടില്ല, അവളുടെ അവയവങ്ങളെല്ലാം നല്ല നിലയിൽ തന്നെയായിരുന്നു. -ദിഷയുടെ പിതാവ് സതീഷ് സാലിയന്‍റെ വാക്കുകൾ

അവൾ ഞങ്ങളുടെ ഏക മകളായിരുന്നു. ഞങ്ങൾക്ക് ഞങ്ങളുടെ മകളെ നഷ്ടമായി. അവർ അവളുടെ പേര് കളങ്കപ്പെടുത്തി, ഇപ്പോൾ അവളുടെ മരണശേഷം ഞങ്ങൾക്ക് പിന്നാലെയാണ്. പീഡിപ്പിച്ച് ഞങ്ങളെ കൊല്ലണം അതാണ് അവർക്ക് വേണ്ടത്.-ദിഷയുടെ കുടുംബം ആരോപിക്കുന്നു.

ദിഷയും പ്രതിശ്രുത വരന്‍ റോഹൻ റോയിയും ലോക്ക്ഡൗണിനു ശേഷം വിവാഹിതരാകാൻ തീരുമാനിച്ചിരുന്നതായും കുടുംബം വ്യക്തമാക്കുന്നു. ജോലി സംബന്ധമായ ചില സമ്മർദങ്ങൾ ദിഷയ്ക്ക് ഉണ്ടായിരുന്നതായും കുടുംബം വ്യക്തമാക്കി. ദിഷയുടെ മാനസിക സമ്മർദം അവളെ ആത്മഹത്യയിലേക്ക് എത്തിക്കുമെന്ന് കരുതിയിരുന്നില്ലെന്നും കുടുംബം വ്യക്തമാക്കി.

ജോലിയുമായി ബന്ധപ്പെട്ട എല്ലാ കാര്യങ്ങളും ദിഷ വീട്ടുകാരുമായി പങ്കുവയ്ക്കാറുണ്ടെന്നും സുശാന്തിനെ കുറിച്ച് ഒന്നും പറഞ്ഞിട്ടില്ലെന്നും സുശാന്തിനെ കുറിച്ച് കൂടുതലൊന്നും അറിയില്ലെന്നും അവർ വ്യക്തമാക്കി.

സുശാന്ത് സിംഗ് രാജ്പുത് ആത്മഹത്യ ചെയ്യുന്നതിന് ഒരാഴ്ച മുമ്പാണ് സുശാന്തിന്റെ മുൻ മാനേജറായിരുന്ന ദിഷ സാലിയൻ ആത്മഹത്യ ചെയ്തത്. ജൂൺ ഒമ്പതിന് ഫ്ലാറ്റിലെ 14ാമത്തെ നിലയിൽ നിന്ന് ചാടിയാണ് ദിഷ ആത്മഹത്യ ചെയ്തത്. ദിഷയുടെയും സുശാന്തിന്റെയും ആത്മഹത്യകൾ തമ്മിൽ ബന്ധമുണ്ടെന്ന തരത്തിലും പ്രചരണങ്ങളുണ്ടായിരുന്നു.