Mumbai cruise drugs case| ഷാരൂഖ് ഖാന്റെ വീട്ടിൽ എൻസിബി സംഘം; അനന്യ പാണ്ഡേയ്ക്ക് ചോദ്യം ചെയ്യലിന് ഹാജാരാകാൻ നോട്ടീസ്

ബോളിവുഡിലെ ലഹരിമരുന്ന് (Mumbai Drug Bust)വിവാദങ്ങൾ വീണ്ടും സജീവ ചർച്ചയാകുകയാണ്. മുംബൈ ആഢംബര കപ്പലിലെ ലഹരിമരുന്ന് കേസിൽ(Mumbai cruise drugs case) ഷാരൂഖ് ഖാന്റെ (Shah Rukh Khan)മകൻ ആര്യൻ ഖാൻ (Aryan Khan)അറസ്റ്റിലായിരുന്നു. ഇന്നലെ ആര്യൻ ഖാന്റെ ജാമ്യാപേക്ഷ മുംബൈ പ്രത്യേക കോടതി തള്ളുകയും ചെയ്തു.

ഇതിന് പിന്നാലെ, ബോളിവുഡ് താരം അനന്യ പാണ്ഡേയുടെ (Ananya Pandey)വീട്ടിലും നാർകോടിക്സ് ബ്യൂറോ(NCB) സംഘം റെയ്ഡ് നടത്തി. അനന്യ പാണ്ഡേയുടെ മൊബൈൽ ഫോൺ എൻസിബി വാങ്ങിയതായാണ് റിപ്പോർട്ടുകൾ. ഇന്ന് ഉച്ചയ്ക്ക് രണ്ട് മണിക്ക് ചോദ്യം ചെയ്യലിന് ഹാജാരകാനും നിർദേശമുണ്ട്.

ഇതിന് പിന്നാലെ, ഷാരൂഖ് ഖാന്റെ മന്നത് എന്ന വസതിയിലും എൻസിബി സംഘം ഇന്ന് എത്തി. ആര്യൻ ഖാന്റെ മറ്റേതെങ്കിലും ഇലക്ട്രോണിക് ഉപകരണങ്ങൾ ഉണ്ടെങ്കിൽ അത് അന്വേഷണ സംഘത്തിന് മുന്നിൽ സമർപ്പിക്കാനും ഉദ്യോഗസ്ഥർ നോട്ടീസ് നൽകിയിട്ടുണ്ട്.

ഇന്ന് ഉച്ചയോടെയാണ് ഷാരൂഖിന്റെ വസതിയിൽ എൻസിബി സംഘം എത്തിയത്. അതേസമയം, ആര്യൻ ഖാന്റെ കേസുമായി ബന്ധപ്പെട്ടാണോ അനന്യ പാണ്ഡേയെ ചോദ്യം ചെയ്യാൻ വിളിപ്പിച്ചതെന്ന് വ്യക്തമല്ല. ഷാരൂഖിന്റേയും അനന്യയുടേയും വീടുകളിൽ ഒരേസമയം തന്നെയാണ് സംഘം എത്തിയത്.

അതേസമയം, മുംബൈ ആർതർ റോഡ് ജയിലിൽ കഴിയുന്ന മകനെ കാണാൻ ഇന്ന് ഷാരൂഖ് ഖാൻ എത്തിയിരുന്നു. ജയിൽ അധികൃതരുടെ സാന്നിധ്യത്തിൽ 18 മിനുട്ടോളം ആര്യനൊപ്പം ഷാരൂഖ് ചെലവഴിച്ചു. ഇതിന് പിന്നാലെയാണ് താരത്തിന്റെ വീട്ടിൽ എൻസിബി സംഘം എത്തിയത്.

ഒക്ടോബർ മൂന്നിലാണ് ആഢംബര കപ്പലിൽ നടത്തിയ റെയ്ഡിനെ തുടർന്ന് ആര്യൻ ഖാൻ അടക്കം ഏഴ് പേരെ എൻസിബി സംഘം അറസ്റ്റ് ചെയ്തത്. കഴിഞ്ഞ ദിവസവും ആര്യൻ ഖാന്റെ ജാമ്യാപേക്ഷ കോടതി തള്ളിയിരുന്നു. ചൊവ്വാഴ്ച്ച ആര്യന്റെ ജാമ്യാപേക്ഷ മുംബൈ ഹൈക്കോടതി പരിഗണിക്കും.