പോലീസ് റെയ്‌ഡിൽ നടൻ ചിരഞ്ജീവിയുടെ അനന്തരവൾ ഉൾപ്പെടെ 150 പേർ പിടിയിൽ

ഗായകൻ രാഹുൽ സിപ്ലിഗഞ്ചും നടി നിഹാരിക കോനിഡേലയും (Niharika Konidela) ഉൾപ്പെടുന്ന സംഘത്തെ ബഞ്ചാര ഹിൽസിലെ ഒരു പബ്ബിൽ നിന്ന് ഞായറാഴ്ച പോലീസ് കസ്റ്റഡിയിലെടുത്തു. ടാസ്‌ക് ഫോഴ്‌സും ബഞ്ചാര ഹിൽസ് പോലീസും കസ്റ്റഡിയിലെടുത്ത 150 പേരിൽ രണ്ട് സെലിബ്രിറ്റികളും ഉൾപ്പെടുന്നുവെന്ന് പോലീസ് സ്ഥിരീകരിച്ചതായി ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. നടൻ ചിരഞ്ജീവിയുടെ അനന്തരവളും രാം ചരണിന്റെയും അല്ലു അർജ്ജുന്റെയും കസിനുമാണ് നിഹാരിക

ബഞ്ചാര ഹിൽസ് പോലീസ് സ്റ്റേഷനിലെ ഒരു ഉന്നത പോലീസ് ഉദ്യോഗസ്ഥൻ ഹൈദരാബാദ് ടൈംസിനോട് പറഞ്ഞതിങ്ങനെ: “ഇന്നലെ രാത്രി ഒരു പബ്ബിൽ 150 ഓളം പേർ പാർട്ടി നടത്തുകയായിരുന്നു. അർദ്ധരാത്രിക്ക് ശേഷം പ്രവർത്തിക്കാൻ പബ്ബിന് അനുമതിയില്ല... (തുടർന്ന് വായിക്കുക)

നിരോധിത ലഹരിവസ്തുക്കൾ പരിസരത്ത് കണ്ടെത്തിയതിനെ തുടർന്ന് കസ്റ്റഡിയിലെടുത്തവരിൽ ഒരു ഗായികയും നടിയും ഉൾപ്പെടുന്നു. ഞങ്ങൾ ഇപ്പോഴും ചോദ്യം ചെയ്യുകയാണ്, ഇതുവരെ എഫ്‌ഐആർ ഫയൽ ചെയ്യാനായിട്ടില്ല. കൂടുതൽ വിശദാംശങ്ങൾ ഉടൻ വെളിപ്പെടുത്തും."

രാഹുലും നിഹാരികയും മറ്റ് നിരവധി വിഐപികൾക്കൊപ്പം രാത്രി പോലീസ് സ്റ്റേഷനിൽ ഉണ്ടായിരുന്നു. ചില സെലിബ്രിറ്റികൾക്കും പോലീസിൽ നിന്ന് നോട്ടീസ് ലഭിച്ചു. പിടിയിലായവർ ലഹരിവസ്തുക്കളുടെ ദുരുപയോഗത്തിൽ ഏർപ്പെട്ടിട്ടുണ്ടോയെന്ന് സ്ഥിരീകരണം കാത്തിരിക്കുകയാണ്. ഞായറാഴ്ച രാവിലെ 8 മണിക്ക് പോലീസ് രാഹുലിനെ വിട്ടയച്ചു. റിപ്പോർട്ടുകൾ പ്രകാരം നിഹാരിക സ്റ്റേഷനിൽ നിന്ന് 12 മണിക്ക് ഇറങ്ങി എന്നും പറയപ്പെടുന്നു

പരിശോധനയ്ക്കായി കസ്റ്റഡിയിലെടുത്ത എല്ലാവരിൽ നിന്നും രക്ത സാമ്പിൾ എടുത്തിട്ടുണ്ട്. മെഡിക്കൽ റിപ്പോർട്ടുകൾ ഇനിയും തിരിച്ചെത്തിയിട്ടില്ല. 2020 മാർച്ചിൽ ഹൈദരാബാദിലെ ഒരു പബ്ബിൽ രാഹുൽ സിപ്ലിഗഞ്ച് തർക്കത്തിൽ ഏർപ്പെട്ടതായും റിപോർട്ടുണ്ട്. കേസ് പുരോഗമിക്കുകയാൽ കൂടുതൽ വിശദാംശങ്ങൾക്കായി കാത്തിരിക്കുകയാണ്

നടനും നിർമ്മാതാവുമായ നാഗേന്ദ്ര ബാബുവിന്റെ മകളാണ് നിഹാരിക. നടൻ പവൻ കല്യാൺ അമ്മാവനാണ്. പ്രധാനമായും തെലുങ്ക് സിനിമകളിൽ പ്രവർത്തിക്കുന്ന നിഹാരിക, നടിയും ടെലിവിഷൻ അവതാരകയുമാണ്. ഓക മനസു (2016) എന്ന ചിത്രത്തിലൂടെയാണ് അവർ അഭിനയലോകത്ത് അരങ്ങേറ്റം കുറിച്ചത്