ശബരിമല: വിശാലബഞ്ച് വാദം ചൊവ്വാഴ്ചയില്ല

ന്യൂഡൽഹി:  ശബരിമല പുനപരിശോധാനാ ഹർജികളെ തുടർന്ന് രൂപീകരിച്ച വിശാലബഞ്ചില്‍ ചൊവ്വാഴ്ച വാദം നടക്കില്ല.  ബഞ്ചിലെ ഒരു ജഡ്ജിക്കുണ്ടായ ആരോഗ്യപ്രശ്‌നത്തെ തുടർന്നാണ് വാദം മാറ്റുന്നതെന്ന് സുപ്രീംകോടതി റജിസ്ട്രാര്‍ അറിയിച്ചു. പുതുക്കിയ കേസ് പട്ടിക ഉടന്‍ പ്രസിദ്ധീകരിക്കും.

ബഞ്ചിലെ ഒരു അംഗത്തിന് ആരോഗ്യപ്രശ്‌നം അനുഭവപ്പെട്ടതിനെ തുടർന്ന് തിങ്കളാഴ്ച ഉച്ചയോടെ വിശാലബഞ്ച് വാദം കേള്‍ക്കുന്നത് നിര്‍ത്തിവച്ചിരുന്നു.  ഇതേത്തുടർന്നാണ് ബാക്കി വാദം ചൊവ്വാഴ്ച കേൾക്കാൻ തീരുമാനിച്ചത്.
കേന്ദ്ര സർക്കാരിനു വേണ്ടി ഹാജരായ സോളിസിറ്റർ ജനറൽ തുഷാർ മേത്തയുടെ വാദമാണ് ചൊവ്വാഴ്ച നടക്കേണ്ടിയിരുന്നത്.

ആചാര സംരക്ഷണത്തിലൂന്നിയുള്ള വാദമാണ് തിങ്കളാഴ്ച തുഷാർ മേത്ത നടത്തിയത്. കേന്ദ്ര സര്‍ക്കാരിന് ശേഷം മുതിര്‍ന്ന അഭിഭാഷകന്‍ കെ പരാശരനാണ് വാദിക്കേണ്ടത്.

 മതാചാരങ്ങളില്‍ കോടതി ഇടപെടരുത് എന്ന് ആവശ്യപ്പെടുന്നവരുടെ വാദമാണ് ആദ്യം കോടതി കേള്‍ക്കുന്നത്.
വിശാല ബെഞ്ചിന്റെ വിധിയുടെ അടിസ്ഥാനത്തിലാകും ശബരിമല പുനഃപരിശോധനാ ഹര്‍ജികള്‍ തീര്‍പ്പാക്കുക.