BIG SALUTE: രക്ഷകരായി ഒഡീഷ പൊലീസ്; 12 ലക്ഷം പേരെ രക്ഷപ്പെടുത്തി

ഭുവനേശ്വർ: ഫോനി ചുഴലിക്കാറ്റ് ആഞ്ഞടിച്ചപ്പോൾ ഒഡീഷയിൽ കൊല്ലപ്പെട്ടത് എട്ടുപേർ. രണ്ടു പതിറ്റാണ്ടിനിടെ ഇന്ത്യയിൽ ആഞ്ഞടിച്ച ശക്തമായ ചുഴലിക്കാറ്റായിരുന്നു ഫോനി. ഏകദേശം 12 ലക്ഷത്തോളം പേരെയാണ് ഒഡീഷയിൽ സുരക്ഷിത സ്ഥാനങ്ങളിലേക്ക് മാറ്റിയത്. രക്ഷാപ്രവർത്തനത്തിന് ചുക്കാൻ പിടിച്ചതാകട്ടെ ഒഡീഷ പൊലീസും.

24 മണിക്കൂർകൊണ്ടാണ് ഒഡീഷയിൽ വമ്പൻ രക്ഷാപ്രവർത്തനം നടത്തിയത്. ഫോനിയിൽ വൻ നാശനഷ്ടങ്ങളുണ്ടായെങ്കിലും ആൾനാശമുണ്ടാകാതിരുന്നത് ഈ രക്ഷാപ്രവർത്തനം കൊണ്ടുമാത്രമാണ്.

കാലാവസ്ഥാ നിരീക്ഷണകേന്ദ്രത്തിന്‍റെ മുന്നറിയിപ്പ് ലഭിച്ചതുമുതൽ എല്ലാ വകുപ്പുകളെയും കൂട്ടിയിണക്കിയുള്ള രക്ഷാപ്രവർത്തനമാണ് ഒഡീഷയിൽ അധികൃതർ നടത്തിയത്.

രക്ഷാപ്രവർത്തനത്തിനായി എല്ലാ സർക്കാർ വകുപ്പുകളും മുന്നിട്ടിറങ്ങിയെങ്കിലും പൊലീസ് വിഭാഗം നടത്തിയ നേതൃത്വപരമായ പ്രവർത്തനങ്ങളാണ് ഏറെ പ്രശംസ ഏറ്റുവാങ്ങിയത്.

പല സ്ഥലങ്ങളിലും സ്വന്തം വീട് വിട്ട് വരാതിരുന്നവരെ ശ്രമകരമായാണ് പൊലീസ് സുരക്ഷിത സ്ഥാനങ്ങളിലെത്തിച്ചത്.