Pariksha Pe Charcha 2020 | കൂടുതൽ മാർക്ക് നേടുന്നതല്ല വിജയത്തിന്‍റെ മാനദണ്ഡമെന്ന് പ്രധാനമന്ത്രി

ന്യൂഡൽഹി: കുടുതൽ മാർക്ക് നേടുന്നതല്ല വിജയത്തിന്‍റെ മാനദണ്ഡമെന്ന് പ്രധാനമന്ത്രി നരേന്ദ്ര മോദി. കുട്ടികളും യുവാക്കളും മാതാപിതാക്കൾക്ക് ഒപ്പം കുടുതൽ സമയം ചെലവഴിക്കണം. ഫോണിൽ ചെലവഴിക്കുന്ന സമയം10 ശതമാനം മാത്രമാക്കി മാറ്റണമെന്നും മോദി പറഞ്ഞു. ഡൽഹിയിൽ താൽക്കത്തോറ സ്റ്റേഡിയത്തിൽ സമ്മർദ്ദമില്ലാതെ പരീക്ഷയെഴുതാൻ  കുട്ടികളെ പ്രാപ്തരാക്കുന്നതിനായുള്ള പരീക്ഷാ പേ ചർച്ചയിൽ സംസാരിക്കുക ആയിരുന്നു പ്രധാനമന്ത്രി നരേന്ദ്രമോദി.

പഠനത്തിനൊപ്പം പഠനേതര പ്രവർത്തനങ്ങൾക്കും സമയം കണ്ടെത്തണമെന്നും പ്രധാനമന്ത്രി നിർദ്ദേശിച്ചു. അല്ലാത്തപക്ഷം കുട്ടികൾ യന്ത്ര മനുഷ്യരെ പോലെ ആകുമെന്നും അദ്ദേഹം കൂട്ടിച്ചേർത്തു. 2000ത്തോളം വിദ്യാർഥികളുമായാണ് പ്രധാനമന്ത്രി നരേന്ദ്ര മോദി സംവദിച്ചത്.

ന്യൂഡൽഹിയിലെ താൽക്കത്തോറ സ്റ്റേഡിയത്തിൽ നടന്ന പരിപാടിയിൽ അധ്യാപകരും, മാതാപിതാക്കളും പങ്കെടുത്തു. ഒമ്പതാംക്ലാസ് മുതൽ പന്ത്രണ്ടാംക്ലാസ് വരെയുള്ള കുട്ടികൾക്കായി ഉപന്യാസ മത്സരം നടത്തിയാണ് പ്രധാനമന്ത്രിയുമായുള്ള സംവാദത്തിന് വിദ്യാർഥികളെ കണ്ടെത്തിയത്.

പൊങ്കൽ, മകരസംക്രാന്തി, ലോഡി തുടങ്ങിയ ഉത്സവങ്ങൾ കണക്കിലെടുത്ത് 16-ന് നടക്കേണ്ടിയിരുന്ന ചർച്ച ഇന്നത്തേക്ക് മാറ്റി വെക്കുകയായിരുന്നു. 2018 മുതലാണ് സ്കൂൾ, കോളേജ് വിദ്യാർഥികൾക്കായുള്ള പ്രധാനമന്ത്രിയുടെ ആശയവിനിമയ പരിപാടി ആരംഭിച്ചത്.