റായ്ബറേലിയെ ഇളക്കിമറിച്ച് സോണിയയുടെ റോഡ് ഷോ

യു.പി.എ അധ്യക്ഷ സോണിയ ഗാന്ധി സിറ്റിങ് മണ്ഡലമായ റായ്ബറേലിയില്‍ നാമനിര്‍ദേശ പത്രിക സമര്‍പ്പിച്ചു. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്കും എഐസിസി ജനറല്‍ സെക്രട്ടറി പ്രിയങ്ക ഗാന്ധിക്കും റോബര്‍ട്ട് വാദ്രക്കും ഒപ്പം റോഡ് ഷോ ആയി എത്തിയാണ് പത്രിക സമര്‍പ്പിച്ചത്.

റായ്ബറേലിയിലെ ഹാത്തി പാര്‍ക്ക്, കച്ചാരി റോഡ് വഴി റോഡ് ഷോ ആയാണ് സോണിയ ഗാന്ധി കലക്ട്രേറ്റില്‍ എത്തി പത്രിക സമര്‍പ്പിച്ചത്. സോണിയ ഗാന്ധി അഞ്ചാം തവണയാണ് റായ്‍ബറേലിയിൽ നിന്ന് ജനവിധി തേടുന്നത്. കോൺഗ്രസില്‍ നിന്നും ബിജെപിയിൽ ചേർന്ന ദിനേശ് പ്രതാപ് സിങ്ങാണ് എതിരാളി.

നാമനിര്‍ദേശ പത്രിക സമർപ്പിക്കുന്നതിന് മുന്നോടിയായി മക്കളായ രാഹുൽ ​ഗാന്ധിക്കും പ്രിയങ്കയ്ക്കും ഒപ്പം പൂജ നടത്തി സോണിയ ഗാന്ധി. കോണ്‍ഗ്രസ് ഓഫീസില്‍ ഹോമകുണ്ഡം കൂട്ടിയായിരുന്നു പൂജ.

പ്രിയങ്കയുടെ മക്കളായ റായ്ഹാനും മിരായയും പൂജയിൽ സംബന്ധിച്ചു. മെയ് ആറിന് അഞ്ചാം ഘട്ടത്തിലാണ് റായ്ബറേലിയിൽ വോട്ടെടുപ്പ്.

2004, 2006 ഉപതെരഞ്ഞെടുപ്പിലും 2009, 2014 ലോക്സഭാ തെരഞ്ഞെടുപ്പിലും സോണിയ ​ഗാന്ധി ഇതേ മണ്ഡലത്തിലാണ് മത്സരിച്ച് വിജയിച്ചത്.

2014ലെ തെരഞ്ഞെടുപ്പിൽ 15.94 ലക്ഷം വോട്ടർമാരുള്ള റാ​യ്​​ബ​റേ​ലി മ​ണ്ഡ​ല​ത്തി​ൽനിന്ന് 5,26,434 വോട്ടുകളുടെ ഭൂരിപക്ഷത്തിലാണ് സോണിയ ​ഗാന്ധി വിജയിച്ചത്.

ഇത്തവണ സോണിയ ഗാന്ധിക്കും രാഹുൽ ഗാന്ധിക്കും എതിരെ എസ്‍പി - ബിഎസ്‍പി സഖ്യം റായ്ബറേലി, അമേഠി മണ്ഡലങ്ങളിൽ സ്ഥാർത്ഥികളെ നിർത്തിയിട്ടില്ല.

കഴിഞ്ഞ ദിവസം അമേഠിയില്‍ രാഹുല്‍ ഗാന്ധിയും നാമനിര്‍ദേശ പത്രിക സമർപ്പിച്ചിരുന്നു.