ഇത് നീതിയുടെ വിജയം, സ്ത്രീയുടെ അന്തസ്സാണ് മുഖ്യം; ട്വീറ്റുമായി നരേന്ദ്ര മോദി

നിർഭയ കേസ് പ്രതികളെ തൂക്കിലേറ്റിയതിന് ശേഷം ട്വീറ്റുമായി പ്രധാനമന്ത്രി നരേന്ദ്ര മോദി. ഇന്ന് പുലർച്ചെ 5.30നാണ് നാല് പ്രതികളെയും തൂക്കിലേറ്റിയത്. മോദിയുടെ ട്വീറ്റ് ചുവടെ:

നീതി നടപ്പിലായി. സ്ത്രീകളുടെ അന്തസ്സും സുരക്ഷയും ഉറപ്പാക്കേണ്ടത് അത്യാവശ്യമാണ്. നമ്മുടെ നാരി ശക്തി എല്ലാ മേഖലയിലും മികവ് പുലർത്തിയിട്ടുണ്ട്. സമത്വത്തിനും അവസരത്തിനും ഊന്നൽ നൽകുന്ന, സ്ത്രീ ശാക്തീകരണത്തിൽ ശ്രദ്ധ കേന്ദ്രീകരിക്കുന്ന ഒരു രാഷ്ട്രം നാം ഒന്നിച്ച് കെട്ടിപ്പടുക്കണം, മോദി ട്വീറ്റിൽ പറയുന്നു

നിര്‍ഭയ കൂട്ടക്കൊല കേസിലെ നാല് പ്രതികളുടേയും വധശിക്ഷ നടപ്പാക്കിയത് കൃത്യംസമയം പാലിച്ചായിരുന്നു. അര്‍ധരാത്രിയില്‍ ഡൽഹി ഹൈക്കോടതിയിലും പിന്നീട് പുലര്‍ച്ചെ മൂന്നര വരെ സുപ്രീംകോടതിയിലും നിര്‍ഭയ കേസ് പ്രതികളുടെ വധശിക്ഷ തടയണം എന്നാവശ്യപ്പെട്ടുള്ള വാദം നടന്നിരുന്നു. വധശിക്ഷ മാറ്റിവച്ചേക്കുമോ എന്ന ആകാംക്ഷയ്ക്ക് ഒടുവിലാണ് വധശിക്ഷ നടപ്പാക്കുന്നതിനെതിരെ പ്രതികളുടെ അഭിഭാഷകനായ എപി സിംഗ് സമര്‍പ്പിച്ച ഹര്‍ജി സുപ്രീംകോടതി തള്ളിയത്

നാല് പേരുടേയും മൃതദേഹങ്ങള്‍ ചട്ടപ്രകാരം അരമണിക്കൂര്‍ സമയം കൂടി തൂക്കുകയറില്‍ തന്നെ കിടന്നു. മരണം പൂര്‍ണമായും ഉറപ്പാക്കാന്‍ വേണ്ടിയാണ് ഇങ്ങനെ ചെയ്തത്. തുടര്‍ന്ന് രാവിലെ ആറ് മണിയോടെ നാല് പേരുടേയും മൃതദേഹങ്ങള്‍ തൂക്കുകയറില്‍ നിന്നും അഴിച്ചു മാറ്റി

ഇന്നത്തെ ദിവസം പെൺകുട്ടികൾക്ക് സമർപ്പിക്കുന്നു എന്നായിരുന്നു നിർഭയയുടെ അമ്മ പറഞ്ഞത്