പിറന്നാൾ ദിനം അമ്മയോടൊപ്പം ആഘോഷിച്ച് പ്രധാനമന്ത്രി നരേന്ദ്രമോദി

പിറന്നാൾ ദിനത്തിൽ അമ്മയുടെ അനുഗ്രഹം വാങ്ങാൻ പ്രധാനമന്ത്രി നരേന്ദ്രമോദി ഗാന്ധിനഗറിലെത്തി. ഗുജറാത്തിലെ ഗാന്ധിനഗറിലെ വീട്ടിലെത്തിയ മോദി അമ്മ ഹീരാബെന്നിനൊപ്പമാണ് ഉച്ചഭക്ഷണം കഴിച്ചത്.

അമ്മയോടൊപ്പം സമയം ചിലവഴിച്ച ശേഷം അയൽവാസികളുമായി സൗഹൃദം പങ്കുവച്ച ശേഷമാണ് മോദി മടങ്ങിയത്. നരേന്ദ്ര മോദിയുടെ 98 വയസ്സുള്ള മാതാവ് ഹീരാബെൻ ഇളയ മകൻ പങ്കജ് മോദിക്കൊപ്പമാണ് താമസം.

വിശേഷ ദിവസങ്ങളിൽ മോദി തിരക്കെല്ലാം മാറ്റിവച്ച് മാതാവിനെ കാണാൻ ഇവിടെ എത്താറുണ്ട്. 69 ാം പിറന്നാള്‍ ആഘോഷിക്കുന്നതിനായി തിങ്കളാഴ്ച രാത്രി തന്നെ മോദി അഹമ്മദാബാദില്‍ എത്തിയിരുന്നു.

രാവിലെ ഗാന്ധിനഗറിൽ നിന്ന് നർമദയിലെ ഏകതാ പ്രതിമയും നർമദാ നദിക്കു കുറുകേയുള്ള സർദാർ സരോവർ അണക്കെട്ടും സന്ദർശിച്ചിരുന്നു. കെവാദിയ ചിത്രശലഭോദ്യാനത്തിലും മോദി എത്തിയിരുന്നു.