മൂന്നു സേനകൾക്കും കൂടി ചീഫ് ഓഫ് ഡിഫന്‍സ്; നിർണായക പ്രഖ്യാപനവുമായി പ്രധാനമന്ത്രി

സേനകൾ തമ്മിലുള്ള ഏകോപനം കൂടുതൽ മെച്ചപ്പെടുത്താൻ  പ്രതിരോധ മേധാവിയെ നിയമിക്കുമെന്നു പ്രഖ്യാപിച്ച് പ്രധാനമന്ത്രി നരേന്ദ്രമോദി. 73-ാം സ്വാതന്ത്ര്യദിനത്തില്‍ ചെങ്കോട്ടയിൽ പതാക ഉയർത്തിയ ശേഷം രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. മൂന്നു സേനകളും തമ്മിലുള്ള ഏകോപനം സുഗമമാക്കാനാണ് പ്രതിരോധ മേധവിയെ നിയമിക്കുന്നത്. 1999-ൽ കാർഗിൽ യുദ്ധകാലത്ത് പ്രതിരോധ മേധാവി വേണമെന്ന ആവശ്യം ആദ്യമായി ഉയർന്നു വന്നത്.

പല രാജ്യങ്ങളിലും സൈന്യത്തിന്റെ ചുമതലയുള്ള ഒരു ഉദ്യോഗസ്ഥന്‌‍ ഉണ്ടാകുമെന്നാണ് നിരീക്ഷകർ ചൂണ്ടിക്കാട്ടുന്നത്. ഈ ഉദ്യോഗസ്ഥൻ സർക്കാരുമായി ആശയവിനിമയം നടത്തി സൈന്യത്തിന്റെ കാര്യക്ഷമമായ പ്രവർത്തനം ഉറപ്പാക്കും. ചീഫ് ഓഫ് ഡിഫന്‍സ് സ്റ്റാഫ്(CDS) എന്നതായിരിക്കും പുതിയ പദവി.

'നമ്മിടെ സൈന്യം ഇന്ത്യയുടെ അഭിമാനമാണ്'- പ്രധാനമന്ത്രി പറഞ്ഞു. നമ്മുടെ സൈനിക വിഭാഗങ്ങൾ തമ്മിലുള്ള ഏകോപനം ഉറപ്പാക്കുന്നതിനാണ് പ്രതിരോധ മേധാവിയെ നിയമിക്കുമെന്ന സുപ്രാധാന തീരുമാനമെടുക്കുന്നത്. ഇത് സൈന്യത്തെ കൂടുതൽ ശക്തമാക്കുമെന്നും അദ്ദേഹം പറഞ്ഞു.

കാർഗിൽ യുദ്ധ അവലോകന കമ്മിറ്റി റിപ്പോർട്ടിനു പിന്നാലെ ഉപപ്രധാനമന്ത്രിയായിരുന്ന എൽ.കെ അദ്വാനിയുടെ നേതൃത്വത്തിലുള്ള മന്ത്രി തല സമിതിയും പ്രതിരോധ മേധാവിയെ നിയമിക്കണമെന്ന് ശിപാർശ ചെയ്തിരുന്നു. പ്രധാനമന്ത്രിയുടെ പ്രഖ്യാപനം നടപ്പാകുന്നതോടെ  മൂന്നു സേനാ വിഭാഗങ്ങൾക്കും കൂടി ഒരു പൊതുതലവൻ  രാജ്യത്തുണ്ടാകും.