'ശുഭമുഹൂർത്തം': തീരുമാനിച്ചിരുന്നതിന് ഒരു ദിവസം മുമ്പെ പ്രഗ്യ സിംഗ് ത‌ാക്കൂർ നാമനിർദേശ പത്രിക സമർപ്പിച്ചു

ഭോപ്പാൽ: തീരുമാനിച്ചിരുന്നതിന് ഒരു ദിവസം മുമ്പെ നാമനിർദേശ പത്രിക സമർപ്പിച്ച് ഭോപ്പാലിലെ ബിജെപി സ്ഥാനാർഥി പ്രഗ്യ സിംഗ് താക്കൂർ. തിങ്കളാഴ്ച കളക്ട്രേറ്റിലെത്തിയാണ് പ്രഗ്യ സിംഗ് നാമനിർദേശ പത്രിക സമർപ്പിച്ചത്.

ഏപ്രിൽ 23ന് പ്രഗ്യ സിംഗ് നാമനിർദേശ പത്രിക സമർപ്പിക്കുമെന്നാണ് നേരത്തെ ബിജെപി അറിയിച്ചിരുന്നത്. തിങ്കളാഴ്ച ഒരു ശുഭ മുഹൂർത്തം ഉണ്ടെന്നാണ് പ്രഗ്യ സിംഗ് പറയുന്നത്. അതിനാലാണ് തിങ്കളാഴ്ച തന്നെ നാമനിർദേശ പത്രിക സമർപ്പിച്ചിരിക്കുന്നത്.

11 പൂജാരിമാർ നടത്തിയ ഒരു പൂജയ്ക്ക് ശേഷം പ്രാര്‍ഥനകൾ ഒരുവിട്ടുകൊണ്ടാണ് പ്രഗ്യ സിംഗ് നാമനിര്‍ദേശ പത്രിക സമർപ്പിച്ചത്. ഭോപ്പാൽ സിറ്റിംഗ് എംപി അലോക് സഞ്ചാറും പ്രഗ്യയ്ക്കൊപ്പം ഉണ്ടായിരുന്നു.

ബാക്കിയുള്ള ഔപചാരികതകളൊക്കെ ചൊവ്വാഴ്ചയോടെ പ്രഗ്യ സിംഗ് പൂർത്തിയാക്കും. അതിനു ശേഷം ഒരു റാലി നടത്താനും തീരുമാനിച്ചിട്ടുണ്ട്. അണികളിൽ നിന്ന് സംഭാവന സ്വീകരിക്കുന്നതിനായി വിവിധ മേഖലകളിലും പ്രഗ്യ സിംഗ് സന്ദർശനം നടത്തും.

ഹേമന്ദ് കർക്കറെക്കെതിരായ വിവാദ പരാമര്‍ശത്തിൽ തെരഞ്ഞെടുപ്പ് കമ്മീഷൻ നൽകിയ കാരണംകാണിക്കൽ നോട്ടീസിന് പ്രഗ്യ കഴിഞ്ഞ ദിവസം മറുപടി നൽകിയിരുന്നു. ഒരു രക്തസാക്ഷിയെയും അപമാനിക്കുന്ന തരത്തിൽ പരാമർശം നടത്തിയിട്ടില്ലെന്നും താൻ നടത്തിയത് തന്റെ അഭിപ്രായ സ്വാതന്ത്ര്യമാണെന്നും അവർ വ്യക്തമാക്കി.

തെരഞ്ഞെടുപ്പ് കമ്മീഷന്റെ നോട്ടീസിന് തന്റെ നിയമ സംഘം മറുപടി നൽകുമെന്നാണ് പ്രഗ്യ പറയുന്നത്. പ്രഗ്യയുടെ പരാമർശത്തിന് ബിജെപി നേതൃത്വം നോട്ടീസ് നൽകിയതായും റിപ്പോർട്ടുകളുണ്ട്. ദിഗ് വിജയ് സിംഗാണ് ഭോപ്പാലിലെ കോൺഗ്രസ് സ്ഥാനാർഥി.