സ്മൃതി ഇറാനി 'ഔട്ട് സൈഡർ'; അമേഠിയിൽ ഷൂ വിതരണം ചെയ്തത് രാഹുലിനെ അപമാനിക്കാൻ: പ്രിയങ്ക ഗാന്ധി

അമേഠി: കേന്ദ്രമന്ത്രി സ്മൃതി ഇറാനി ഔട്ട്സൈഡറെന്ന് കോൺഗ്രസ് നേതാവ് പ്രിയങ്ക ഗാന്ധി. അമേഠിയിൽ സ്മൃതി ഇറാനി ഷൂ വിതരണം ചെയ്തത് രാഹുലിനെ അപമാനിക്കാനാണെന്നും പ്രിയങ്ക പറഞ്ഞു. അമേഠിയിലെ ജനങ്ങൾ ഭിക്ഷക്കാരല്ലെന്നും പ്രിയങ്ക.

അമേഠിയിൽ ജനങ്ങളോട് സംസാരിക്കുകയായിരുന്നു പ്രിയങ്ക. അമേഠിയിലെയും റായ്ബറേലിയിലെയും ജനങ്ങൾ ആത്മാഭിമാനമുള്ളവരാണെന്നും ആർക്കുമുന്നിലും ഒന്നിനു വേണ്ടിയും യാചിക്കാത്തവരാണെന്നും പ്രിയങ്ക പറഞ്ഞു. നിങ്ങളുടെ വോട്ടിനായി യാചിക്കുന്നത് ബിജെപിയാണെന്നും പ്രിയങ്ക പറഞ്ഞു.

പുറത്തു നിന്നു വന്ന സ്മൃതി ഇറാനി അമേഠിയിൽ ഷൂ വിതരണം ചെയ്തതിനെ പ്രിയങ്ക വിമർശിച്ചു. ഇങ്ങനെചെയ്തതുകൊണ്ട് രാഹുലിനെ അപമാനിക്കാമെന്നാണ് സ്മൃതി ഇറാനി കരുതിയത്. യഥാർഥത്തിൽ സ്മൃതി ഇറാനി അപമാനിച്ചിരിക്കുന്നത് അമേഠിയിലെ ജനങ്ങളെയാണ്- പ്രിയങ്ക പറഞ്ഞു.

അമേഠിയിലെ ജനങ്ങൾ വിവേകമുള്ളവരാണ്. അമേഠിയിൽ ഫുഡ് പാർക്ക് തുടങ്ങാൻ പോകുന്നത് ആരാണെന്ന് അവർക്കറിയാം. ഫുഡ് പാർക്ക് ഇതുവരെ ആരംഭിച്ചിട്ടില്ലെന്നും അവർക്കറിയാം. അമേഠിയിലെയും റായ്ബറേലിയിലെയും അഞ്ച് ലക്ഷം കർഷകർക്കാണ് ഫുഡ് പാർക്കിന്റെ ഗുണം ലഭിക്കാൻ പോകുന്നത്- പ്രിയങ്ക വ്യക്തമാക്കി.

അതേസമയം പ്രിയങ്കയ്ക്ക് മറുപടിയുമായി സ്മൃതി ഇറാനി രംഗത്തെത്തി. ഞാനൊരു നടിയാണ്. അതുകൊണ്ട് എനിക്ക് മുന്നിൽ പ്രിയങ്ക അഭിനയിക്കാതിരിക്കുന്നതാണ് നല്ലത്- സ്മൃതി പറഞ്ഞു. രാഹുലിനെതിരെ ഇത് രണ്ടാം തവണയാണ്സ്മൃതി മത്സരിക്കുന്നത്.