COVID 19| പൊതുഗതാഗത സംവിധാനം നിർത്തലാക്കും; 20ലധികം പേർ ഒത്തുകൂടരുത്: കര്‍ശന നിയന്ത്രണങ്ങളുമായി പഞ്ചാബ്

ഛണ്ഡിഗർ: കൊറോണ വൈറസിനെ നേരിടുന്നതിനായി ശക്തമായ നിയന്ത്രണങ്ങളുമായി പഞ്ചാബ്. പൊതുഗതാഗത സംവിധാനം ഉൾപ്പെടെ താത്കാലികമായി നിർത്തലാക്കിക്കൊണ്ട് വൈറസിനെ നേരിടുന്നതിനാണ് ശ്രമിക്കുന്നത്. ഇതിനെ തുടർന്ന് മാർച്ച് 20 അർധരാത്രിമുതൽ പൊതുഗതാഗത സംവിധാനങ്ങൾ സർക്കാർ താത്കാലികമായി നിർത്തും.

വെള്ളിയാഴ്ച അർദ്ധരാത്രി മുതൽ ബസുകൾ, ഓട്ടോറിക്ഷകൾ, ടെമ്പോകൾ എന്നിവ സംസ്ഥാനത്ത് ഓടിക്കാൻ അനുവദിക്കില്ല. പകർച്ചവ്യാധി തടയുന്നതിനുള്ള സംസ്ഥാനത്തിന്റെ തയ്യാറെടുപ്പ് അവലോകനം ചെയ്യാൻ ചേർന്ന മന്ത്രിമാരുടെ യോഗത്തിലാണ് തീരുമാനം.

പകർച്ചാവ്യാധി നേരിടുന്നത് പൊതുഗതാഗത സംവിധാനങ്ങൾ നിർത്തലാക്കിയിരിക്കുന്ന ആദ്യ സംസ്ഥാനമാണ് പഞ്ചാബ്. രാജ്യത്ത് 168 പേർക്കാണ് വൈറസ് ബാധ സ്ഥിരീകരിച്ചിരിക്കുന്നത്. ഇതുവരെ മൂന്ന് മരണവും റിപ്പോർട്ട് ചെയ്തിട്ടുണ്ട്.

വിവാഹം, മരണം തുടങ്ങിയ ചടങ്ങുകൾക്ക് 20ൽ കൂടുതൽ പേർ ഒത്തുകൂടരുതെന്നും കർശന നിർദേശം നൽകിയിട്ടുണ്ട്. നേരത്തെ ഇത് 50 ആയിരുന്നു. മറ്റ് സംസ്ഥാനങ്ങളും ഒത്തുചേരലുകൾക്ക് ഇത്തരം നിരോധനങ്ങൾ ഏർപ്പെടുത്തിയിട്ടുണ്ടെങ്കിലും വിവാഹങ്ങൾക്ക് ഇളവ് നൽകിയിരുന്നു.

എല്ലാ എസ്‌എസ്‌പിമാരോടും ഡിസിപിമാരോടും അവരുടെ പ്രദേശങ്ങളിലെ ചുമതലകൾ ഏറ്റെടുക്കാനും മാർഗനിർദ്ദേശങ്ങൾ പാലിക്കുന്നുണ്ടെന്ന് ഉറപ്പാക്കാനും ആവശ്യപ്പെട്ടിട്ടുണ്ട്.ബുധനാഴ്ഛ ഛണ്ഡീഗഢിൽ ആദ്യ കൊറോണ കേസ് റിപ്പോർട്ട് ചെയ്തതിന്റെ പശ്ചാത്തലത്തിലാണ് മുൻകരുതൽ നടപടികള്‍ ശക്തമാക്കിയിരിക്കുന്നത്.

മാർച്ച് 31 വരെയുള്ള സർക്കാർ സ്കൂളുകളിലെ പരീക്ഷകളും മാറ്റിവെച്ചു. പുതിയ തീയതി ഏപ്രിൽ ഒന്നിന് അറിയിക്കും. ടീച്ചർമാരോട് സ്കൂളുകളില്‍ വരരുതെന്നും ഒരു തരത്തിലുള്ള ജോലിയും ചെയ്യരുതെന്നും നിർദേശിച്ചിട്ടുണ്ട്.

വൈറസിന്റെ സാമൂഹ്യ വ്യാപനം തടയുന്നതിന് അത്യാവശ്യമല്ലാത്ത യാത്രകൾ മാറ്റിവയ്ക്കാൻ കേന്ദ്ര സർക്കാർ നിർദേശം നൽകിയിട്ടുണ്ട്. യാത്രക്കാരില്ലാത്തതിനെ തുടർന്ന് നിരവധി ട്രെയിനുകളും റെയിൽവെ റദ്ദാക്കി. വൈറസിന്റെ വ്യാപനം തടയുന്നതിന് മാർച്ച് 31 വരെ സ്കൂളുകൾക്കും കോളജുകൾക്കും പഞ്ചാബിൽ നേരത്തെ തന്നെ അവധി നൽകിയിരുന്നു.

ആരോഗ്യ സംബന്ധിച്ച വിവരങ്ങൾ അറിയുന്നതിനായി പഞ്ചാബ് സർക്കാർ 104 എന്ന ഹെൽപ്പ് ലൈൻ നമ്പർ ആരംഭിച്ചിട്ടുണ്ട്. ദേശീയ കോൾ സെന്റർ നമ്പർ 011-23978046, സ്റ്റേറ്റ് കൺട്രോൾ റൂം നമ്പറുകൾ 88720-90029, 0172-2920074 എന്നിവയും സജീവമാണ്.