ദക്ഷിണേന്ത്യയിൽ മത്സരിക്കുന്ന മൂന്നാമത്തെ ഗാന്ധി കുടുംബാംഗം

ദക്ഷിണേന്ത്യയിൽ മത്സരിക്കുന്ന മൂന്നാമത്തെ ഗാന്ധികുടുംബാംഗമാണ് രാഹുൽ ഗാന്ധി. അടിയന്താരാവസ്ഥയിൽ അടിതെറ്റിയ ഇന്ദിരാഗാന്ധിയുടെ തിരിച്ചുവരവിന് കർണ്ണാടക വേദിയായി. 1999-ൽ അമേഠിക്ക് പുറമെ സോണിയാ ഗാന്ധി മത്സരിക്കാൻ തെരഞ്ഞെടുത്തത് കർണാടകയായിരുന്നു. പിന്നീട് ഈ മണ്ഡലങ്ങൾ കോൺഗ്രസിനെ കൈവിട്ട ചരിത്രവുമുണ്ട്.

റായ്ബറേലിയായിരുന്നു ഇന്ദിരയുടെ തട്ടകം. അടിയന്തരാവസ്ഥയ്ക്ക് ശേഷം രാജ്നാരായൺ എന്ന സോഷ്യലിസ്റ്റിന് മുന്നിൽ ഇന്ദിര തോറ്റു. 77 ലെ ഇന്ദിരാവിരുദ്ധ തരംഗത്തിൽ ഒപ്പം നിന്ന കർണാടക വഴി പാർലമെന്റിലെത്താനായിരുന്നു തീരുമാനം. ചിക്മാംഗ്ലൂർ എംപി ഡി ബി ചന്ദ്രഗൗഡ ഇന്ദിരാഗാന്ധിക്കായി മണ്ഡലമൊഴിഞ്ഞു. ഇന്ദിരയെ മകളെന്ന് വിളിച്ച് ജനങ്ങൾ ആർപ്പുവിളിച്ചു. വീണ്ടും ഇന്ദിരാവിജയങ്ങളുടെ തുടക്കം.

80ൽ ഇന്ദിര ആന്ധ്രയിലെ മേഡക്കിലേക്കു മാറി. 1999 ൽ തെരഞ്ഞെടുപ്പിലെ കന്നിയങ്കത്തിന് ഇറങ്ങിയ സോണിയാ ഗാന്ധി അമേഠിക്കൊപ്പം തെരഞ്ഞെടുത്തത് കർണാടകയിലെ ബെല്ലാരി. 98ൽ അമേഠിയിൽ ബിജെപി ജയിച്ചതാണ് സുരക്ഷിത മണ്ഡലം തേടാൻ സോണിയയെ പ്രേരിപ്പിച്ചത്. അതുവരെ ബെല്ലാരിക്ക് കോൺഗ്രസിനെ മാത്രം ജയിപ്പിച്ച ചരിത്രമായിരുന്നു ഉണ്ടായിരുന്നത്.

അമേഠിയിൽ സഞ്ജയ് സിങ്ങിനെയും ബെല്ലാരിയിൽ സുഷമ സ്വാരാജിനെയും സോണിയ തോൽപ്പിച്ചു. രണ്ടിടത്തും ജയിച്ചപ്പോൾ ബെല്ലാരി വിട്ട് അമേഠി നിലനിർത്തി.

ഇന്ദിരയ്ക്കും സോണിയക്കും പിന്നാലെ രാഹുൽ എത്തുകയാണ്. ഇന്ദിരയും സോണിയയും മത്സരിച്ച ദക്ഷിണേന്ത്യൻ മണ്ഡലങ്ങൾ കോൺഗ്രസിനെ കൈവിട്ടതാണ് പിൻകാല ചരിത്രം. രണ്ടിടത്തു മത്സരിക്കുന്ന രാഹുൽ മണ്ഡലത്തിൽ നിന്ന് ജയിച്ചാൽ വയനാട് നിലനിർത്തുമോ എന്നത് കാത്തിരുന്ന് കാണാം.