നിർഭയരാകാൻ ഇനിയുമെത്ര ദൂരം; നിർഭയ സംഭവത്തിന് ഇന്ന് ഏഴാണ്ട്

നിർഭയ സംഭവത്തിന് ഇന്ന് ഏഴാണ്ട്. 2012 ഡിസംബർ 16നായിരുന്നു രാജ്യം പിന്നീട് നിർഭയ എന്ന് പേരുവിളിച്ച പെൺകുട്ടി അതിദാരുണമായി പീഡിപ്പിക്കപ്പെട്ടത്. രാജ്യതലസ്ഥാനത്ത്, ഭരണസിരാകേന്ദ്രത്തിന്റെ കണ്മുന്നിലാണ് ആ പെൺകുട്ടി അതി ക്രൂരമായി പീഡിപ്പിക്കപ്പെട്ടത് .

സുഹൃത്തിനൊപ്പം യാത്ര ചെയ്ത ഫിസിയോ തെറാപ്പി വിദ്യാർത്ഥിനിയാണ് ഓടുന്ന ബസിൽ കൂട്ടബലാത്സംഘത്തിന് ഇരയായത്. പീഡനത്തിനിടയിൽ അക്രമികൾ അവളുടെ ശാരീരികാവയവങ്ങളിലേക്ക് ഇരുമ്പുകമ്പി തള്ളിക്കയറ്റി.അവശനിലയിൽ വഴിയിൽ ഉപേക്ഷിക്കപ്പെട്ട പെൺകുട്ടി 17 ദിവസം മരണത്തോട് മല്ലടിച്ചു.

കണ്ണില്ലാത്ത കാടത്തത്തിന് മുന്നിൽ രാജ്യം തലകുനിച്ചു... വൻ പ്രതിഷേധമുയർന്നു.,,, എന്നാൽ പ്രാർത്ഥനകളും കാത്തിരിപ്പും വിഫലമാക്കി ഡിസംബർ 29 ന് സിംഗപ്പൂരിലെ മൗണ്ട് എലിസബത്ത് ആശുപത്രിയിൽ അവൾ മരണത്തിന് കീഴടങ്ങി.

ഇന്ത്യൻ ക്രിമിനൽ കേസുകളുടെ ചരിത്രത്തിൽ നാഴികക്കല്ലായ നിർഭയ കേസിൽ പരമോന്നത കോടതി പ്രതികൾക്ക് വധശിക്ഷ വിധിച്ചു. ആറു പ്രതികളില്‍ ഒരാള്‍ പ്രായപൂര്‍ത്തിയാകാത്തതിനാല്‍ ശിക്ഷയില്‍ നിന്ന് രക്ഷപ്പെട്ടു. മറ്റൊരു പ്രതി രാം സിംഗ് ജയിലില്‍ തൂങ്ങിമരിച്ചു. ശേഷിക്കുന്ന നാല് പ്രതികളെയാണ് കഴുമരം കാത്തിരിക്കുന്നത്.

അതേസമയം നിർഭയ പാഠമായില്ലെന്ന് , വർദ്ധിച്ചു വരുന്ന സ്ത്രീ പീഡനങ്ങൾ വ്യക്തമാക്കുന്നു. തെലങ്കാനയിൽ വനിതാ മൃഗഡോക്ടറെ ബലാത്സംഘം ചെയ്ത് തീകൊളുത്തി കൊന്നതും ഉന്നാവിലെ പെൺ കുട്ടിയെ ചുട്ടെരിച്ചതും ദിവസങ്ങൾ മുമ്പ് മാത്രം.

ഫത്തേപുരില്‍ ബന്ധുവായ യുവാവ് ബലാത്സംഗം ചെയ്ത് തീകൊളുത്തിയ 18 കാരിയുടെ നില അതീവഗുരുതരമായി തുടരുമ്പോഴാണ് നിർഭയയുടെ നൊമ്പര സ്മരണയ്ക്ക് മുന്നിൽ രാജ്യം ഒരിക്കൽക്കൂടി കണ്ണീർ പുഷ്പങ്ങളർപ്പിക്കുന്നത്.