മോദിയുടെ തെരഞ്ഞെടുപ്പ് റാലി; സുരക്ഷയ്ക്കായി NSG കമാൻഡോസ്, സ്നിപേഴ്സ് മുതൽ ആന്‍റി ഡ്രോൺ യൂണിറ്റ് വരെ

ന്യൂഡൽഹി: പ്രധാനമന്ത്രി നരേന്ദ്ര മോദിയുടെ തെരഞ്ഞെടുപ്പ് റാലി ഡൽഹിയിലെ രാംലീല മൈതാനിയിൽ ഇന്ന്. തെരഞ്ഞെടുപ്പ് റാലിക്ക് മുമ്പായി വൻ സുരക്ഷാസന്നാഹമാണ് ഡൽഹിയിൽ ഒരുക്കിയിരിക്കുന്നത്. സ്നിപേഴ്സ് (ഒളിഞ്ഞ ഇടത്തില്‍നിന്നും വെടിവയ്ക്കുന്നയാള്‍) മുതൽ ആന്‍റി ഡ്രോൺ യൂണിറ്റ് വരെ സുരക്ഷ മുൻകരുതലായി ഒരുക്കിയിരിക്കുന്നത്.

പൗരത്വനിയമ ഭേദഗതിക്ക് എതിരെ സമരം നടക്കുന്ന പശ്ചാത്തലത്തിൽ വളരെ വിപുലമായ സുരക്ഷാസജ്ജീകരണങ്ങളാണ് പ്രധാനമന്ത്രിക്കായി ഒരുക്കിയിരിക്കുന്നത്.

20 കമ്പനി സേനയെയാണ് സുരക്ഷയ്ക്കായി നിയോഗിച്ചിരിക്കുന്നതെന്ന് മുതിർന്ന പൊലീസ് ഉദ്യോഗസ്ഥൻ അറിയിച്ചു. ഓരോ കമ്പനിയിലും 70 മുതൽ 80 വരെ അംഗങ്ങളാണ് ഉള്ളത്. ഡി സി പി റാങ്കിലുള്ള 20 ഉദ്യോഗസ്ഥരും ലോക്കൽ പൊലീസിൽ നിന്നുള്ള 1000 പേരും ആന്‍റി ഡ്രോൺ ടീമും എൻ എസ് ജി കമാൻഡോകളും സുരക്ഷാവലയം തീർക്കാൻ ഉണ്ടാകും. റാലി നടക്കുന്ന മുഴുവൻ സ്ഥലവും ശുദ്ധീകരിച്ച് കഴിഞ്ഞതായി ഉദ്യോഗസ്ഥർ അറിയിച്ചു.

മേഖല ശുദ്ധീകരിക്കുന്നതിന്‍റെ ഭാഗമായി കടകൾ അടപ്പിച്ചു. പ്രദേശത്ത് സുരക്ഷാ ഉദ്യോഗസ്ഥരെ വിന്യസിച്ചു. പ്രധാനമന്ത്രി ഉപയോഗിക്കുന്ന പാതയിൽ ട്രാഫിക് പൊലീസുകാരെയും നിയോഗിച്ചു കഴിഞ്ഞു. ഡൽഹി നിയമസഭാ തെരഞ്ഞെടുപ്പിന് മുന്നോടിയായാണ് പ്രധാനമന്ത്രി നരേന്ദ്ര മോദിയുടെ ഇന്നത്തെ റാലി.