യുപിയിൽ 11 MLAമാർ എംപിമാരായി; ഉപതെരഞ്ഞെടുപ്പിൽ മഹാസഖ്യം തുടരാൻ അഖിലേഷും മായാവതിയും

ലഖ്നൌ: ലോക്സഭാ തെരഞ്ഞെടുപ്പ് ഫലത്തോടെ എസ്.പി-ബി.എസ്.പി സഖ്യം പൊളിയുമെന്ന് പ്രവചിച്ചവർക്ക് തെറ്റി. കൂടുതൽ ശക്തമായി മുന്നോട്ടുപോകാനാണ് മായാവതിയും അഖിലേഷ് യാദവും തീരുമാനിച്ചിരിക്കുന്നത്. 2022ൽ നടക്കുന്ന നിയമസഭാ തെരഞ്ഞെടുപ്പിലും സഖ്യം തുടരുമെന്ന് ഇരു നേതാക്കളും സൂചന നൽകി.

ഉത്തർപ്രദേശിൽനിന്ന് 11 എം.എൽ.എമാർ ലോക്സഭയിലേക്ക് തെരഞ്ഞെടുക്കപ്പെട്ടതോടെയാണ് ഈ നിയമസഭാ സീറ്റുകളിൽ ഉപതെരഞ്ഞെടുപ്പ് നടക്കും. ഉപതെരഞ്ഞെടുപ്പിലും സഖ്യം തുടരാനാണ് മായാവതിയുടെയും അഖിലേഷിന്‍റെയും തീരുമാനം.

സമാജ് വാദി പാർട്ടിയുമായും ആർഎൽഡിയുമായുള്ള സഖ്യം തുടരുമെന്ന് മായാവതി പ്രവർത്തകരോട് പറഞ്ഞു. ഡൽഹിയിലേക്ക് തിരിക്കുമുമ്പായിരുന്നു മായാവതിയുടെ പ്രഖ്യാപനം. ഉപതെരഞ്ഞെടുപ്പിൽ സഖ്യം തുടരുമെന്ന പ്രഖ്യാപനം വന്നതോടെ രാഷ്ട്രീയ നിരീക്ഷകർ ഏറെ പ്രാധാന്യമാണ് നൽകുന്നത്.

ഉത്തർപ്രദേശിൽ 11 എം.എൽ.എമാർ ലോക്സഭാ തെരഞ്ഞെടുപ്പിൽ ജയിച്ചിരുന്നു. ഇതിൽ ഒമ്പത് പേർ ബിജെപിയിൽനിന്നും ഓരോരുത്തർ എസ്.പി, ബി.എസ്.പി പാർട്ടികളിൽനിന്നുമുള്ളവരാണ്.