കർണാടകയിലെ വിമത എംഎൽഎമാരെയെല്ലാം അയോഗ്യരാക്കി

ബെംഗളൂരു: കർണ്ണാടകയിലെ എല്ലാ വിമത എംഎൽഎമാരെയും അയോഗ്യരാക്കി. 14 പേരെക്കൂടിയാണ് സ്പീക്കർ കെ ആർ രമേഷ് കുമാർ അയോഗ്യരാക്കിയത്. ഇതോടെ വിമതരെല്ലാം സഭയ്ക്ക് പുറത്തായി. നാളെയാണ് യെദ്യൂരപ്പ സർക്കാർ വിശ്വാസ വോട്ട് തേടുന്നത്.

കോൺഗ്രസിലെ 11 പേരും ജെഡിഎസിലെ മൂന്നു പേരുമാണ് അയോഗ്യരായത്. ഇതോടെ കർണാടക നിയമസഭയിൽ അയോഗ്യരായ എംഎൽഎമാരുടെ എണ്ണം 17 ആയി.

കഴിഞ്ഞ ദിവസം മുഖ്യമന്ത്രിയായി സത്യപ്രതിജ്ഞ ചെയ്ത യെദ്യൂരപ്പ സർക്കാർ നാളെയാണ് വിശ്വാസവോട്ട് തേടുന്നത്. 17 വിമത എംഎൽഎമാർ അയോഗ്യരായതോടെ വിശ്വാസവോട്ട് തേടുന്ന യെദ്യൂരപ്പയും പ്രതിസന്ധി നേരിടുകയാണ്.

ദിവസങ്ങൾ നീണ്ട അനിശ്ചിതത്വത്തിനൊടുവിൽ മുഖ്യമന്ത്രിയായിരുന്ന എച്ച്.ഡി. കുമാരസ്വാമി അവതരിപ്പിച്ച വിശ്വാസപ്രമേയം സഭയിൽ പരാജയപ്പെടുകയായിരുന്നു. 99ന് എതിരെ 105 വോട്ടുകൾക്കാണ് കുമാരസ്വാമിയുടെ പ്രമേയം പരാജയപ്പെട്ടത്. ഇതോടെയാണ് യെദ്യൂരപ്പ വീണ്ടും മുഖ്യമന്ത്രിയാകാൻ വഴിയൊരുങ്ങിയത്.