പട്ടേൽ പ്രതിമ കാണാൻ ഒഴുകിയെത്തുന്നത് ജനലക്ഷങ്ങളെന്ന് സർക്കാർ; വരുമാനം വർധിച്ചത് കോടികൾ

അഹമ്മദാബാദ്: ലോകത്തിലെ ഏറ്റവും ഉയരമേറിയ പ്രതിമ സ്റ്റാച്യു ഓഫ് യൂണിറ്റി(സർദാർ പട്ടേൽ പ്രതിമ) കാണാനെത്തിയത് ലക്ഷകണക്കിന് സഞ്ചാരികൾ. ബിജെപി പാർലമെന്‍റ് അംഗം വരുൺ ഗാന്ധിയുടെ ചോദ്യത്തിന് ടൂറിസം സഹമന്ത്രി കെ.ജെ അൽഫോൺസ് എഴുതി നൽകിയ മറുപടിയിലാണ് ഇക്കാര്യമുള്ളത്.

2018 നവംബർ മുതൽ 2019 ജനുവരി വരെയുള്ള കാലയളവിൽ 7.81 ലക്ഷം പേരാണ് പട്ടേൽ പ്രതിമ കാണാനെത്തിയത്. ഇതിൽനിന്ന് 19.47 കോടി രൂപ വരുമാനം ലഭിച്ചതായും മന്ത്രി വ്യക്തമാക്കി.

കഴിഞ്ഞ അഞ്ചു വർഷമായി സർദാർ സരോവർ ഡാം കാണാനെത്തുന്ന സഞ്ചാരികളുടെ എണ്ണം പ്രതിവർഷം ശരാശരി 8.22 ലക്ഷമായിരുന്നു. എന്നാൽ പട്ടേൽ പ്രതിമ ഉദ്ഘാടനം ചെയ്തു മൂന്നുമാസത്തിനകം എട്ടു ലക്ഷത്തോളം സഞ്ചാരികളെത്തിയത് വലിയ നേട്ടമാണെന്ന് കേന്ദ്ര സർക്കാർ അവകാശപ്പെടുന്നു.

മേഖലയിലെ ടൂറിസം വികസനത്തിനായി കൂടുതൽ പദ്ധതി കൊണ്ടുവരുമെന്നും മന്ത്രി പറഞ്ഞു. ജംഗിൾ സഫാരി, അമ്യൂസമെന്‍റ് പാർക്ക്, അഡ്വഞ്ചർ & എക്കോ ടൂറിസം പാർക്ക്, ചിൽഡ്രൻസ് പാർക്ക്, ശ്രേഷ്ഠ ഭാരത് ഭവൻ മുതൽ സ്റ്റാച്യൂ ഓഫ് യൂണിറ്റി വരെ ബോട്ടിങ് തുടങ്ങിയ പദ്ധതികളും നടപ്പാക്കിവരുന്നുണ്ട്.

അഹമ്മദാബാദിൽനിന്ന് പട്ടേൽ പ്രതിമയിലേക്ക് സീ പ്ലെയിൻ പദ്ധതി ആരംഭിക്കും.

ഗുജറാത്തിലെ നർമദ ജില്ലയിലെ സർദാർ സരോവർ ഡാമിന് സമീപത്തായാണ് 182 മീറ്റർ ഉയരമുള്ള പ്രതിമ സ്ഥിതി ചെയ്യുന്നത്.