അയോധ്യ വിധി: പുനപരിശോധനാ ഹർജികൾ സുപ്രീംകോടതി തള്ളി

അയോധ്യ വിധി പുനഃപരിശോധിക്കണമെന്നാവശ്യപ്പെട്ടുള്ള ഹര്‍ജികളെല്ലാം സുപ്രീംകോടതി തള്ളി. ജംയത്തുല്‍ ഉലുമ ഇ ഹിന്ദ്, വിശ്വഹിന്ദു പരിഷത്ത്, നിർമ്മോഹി അഖാഡ, 40 ആക്ടിവിസ്റ്റുകൾ എന്നിവർ നൽകിയ 18 ഹര്‍ജികളാണ് ചീഫ് ജസ്റ്റിസ് എസ്.എ ബോബ്ഡേയുടെ ചേംബറിൽ നടത്തിയ പരിശോധനയിൽ തള്ളിയത്.

ചീഫ് ജസ്റ്റിസിനെ കൂടാതെ ജസ്റ്റിസുമാരായ ഡി.വൈ ചന്ദ്രചൂഡ്, അശോക് ഭൂഷൺ, എസ്.എ നസീർ, ശഞ്ജീവ് ഖന്ന എന്നിവരടങ്ങിയ ഭരണഘടനാ ബെഞ്ചാണ് ഹർജികൾ തള്ളിയത്.

അയോധ്യ ഭൂമി തർക്കം സംബന്ധിച്ച സുപ്രീം കോടതി വിധി പുനപരിശോധിക്കണമെന്നതായിരുന്നു എല്ലാ ഹർജികളിലെയും ആവശ്യം. നിയമം കൈയ്യിലെടുക്കകയും പള്ളി പൊളിക്കുകയും ചെയ്ത ഹിന്ദു സംഘടനകൾക്കുള്ള പ്രതിഫലമാണ് കോടതി വിധിയെന്നാണ് മുസ്ലീം വിഭാഗത്തിൽപ്പെട്ട സംഘടനകൾ നൽകിയ ഹർജിയിൽ ചൂണ്ടിക്കാട്ടിയിരുന്നത്.

മതേതരത്വത്തേക്കാൾ ഹിന്ദു വിശ്വാസത്തെ അടിസ്ഥാനമാക്കിയുള്ളതാണ് വിധിയെന്നും അഖിലേന്ത്യാ മുസ്‌ലിം വ്യക്തി നിയമ ബോർഡ് നൽകിയ ഹർജിയിൽ ആരോപിച്ചിരുന്നു.

News18

നവംബർ 9-ന് അന്നത്തെ ചീഫ് ജസ്റ്റിസ് രഞ്ജൻ ഗോഗോയിയുടെ അധ്യക്ഷതയിലുള്ള അഞ്ചംഗ ഭരണഘടനാ ബെഞ്ചാണ് അയോധ്യ തർക്കത്തിൽ വിധി പ്രഖ്യാപിച്ചത്.

2.77 ഏക്കർ തർക്ക ഭൂമി ഉപാധികളോടെ ഹിന്ദുക്കള്‍ക്ക് വിട്ടു നല്‍കണമെന്നും മുസ്ലികള്‍ക്ക് ആരാധനയ്ക്ക് പകരം ഭൂമി നല്‍കണമെന്നുമായിരുന്നു സുപ്രീംകോടതി വിധി. ഭൂമി കൈകാര്യം ചെയ്യാനായി പ്രത്യേക ട്രസ്റ്റ് മൂന്നു മാസത്തിനുള്ളില്‍ രൂപീകരിക്കുമെന്നും സുപ്രീം കോടതി നിർദ്ദേശിച്ചിരുന്നു.