ഡോ.കഫീൽ ഖാന്‍റെ മോചനം; ചോദ്യം ചെയ്ത് യുപി സർക്കാർ സമർപ്പിച്ച ഹർജി സുപ്രീം കോടതി തള്ളി

ന്യൂഡൽഹി: ഡോ.കഫീൽ ഖാന്‍റെ മോചനത്തിന് ഉത്തരവിട്ട ഹൈക്കോടതി ഉത്തരവ് ചോദ്യം ചെയ്ത യുപി സർക്കാരിന് തിരിച്ചടി. ഹൈക്കോടതി ഉത്തരവിനെതിരെ സർക്കാർ സമർപ്പിച്ച ഹര്‍ജി സുപ്രീം കോടതി തള്ളി.

ദേശസുരക്ഷനിയമ പ്രകാരം തടവിലാക്കപ്പെട്ട കഫീൽ ഖാനെ ഇക്കഴിഞ്ഞ സെപ്റ്റംബർ ഒന്നിനാണ് അലഹബാദ് ഹൈക്കോടതി ഉത്തരവിനെ തുടർന്ന് മോചിപ്പിച്ചത്. ഖാന്‍റെ അമ്മയായ നുസ്ഹത് പർവീണിന്‍റെ ഹർജി പരിഗണിച്ച കോടതി, കഫീൽ ഖാന്‍റെ തടവ് നിയമവിരുദ്ധമാണെന്ന് ചൂണ്ടിക്കാട്ടി അടിയന്തിര മോചനത്തിന് ഉത്തരവിട്ടിരുന്നു. 

ഈ ഉത്തരവ് ചോദ്യം ചെയ്താണ് യോഗി ആദിത്യനാഥ് സർക്കാർ സുപ്രീം കോടതിയെ സമീപിച്ചത്. കുറ്റകൃത്യത്തിലേർപ്പെട്ട ചരിത്രമാണ് കഫീൽ ഖാന് ഉള്ളതെന്നാണ് സർക്കാർ ഹർജിയിൽ ചൂണ്ടിക്കാട്ടിയത്. ഇതേകാരണം കൊണ്ടാണ് അച്ചടക്ക നടപടിയിലേക്ക് കടന്നതെന്നും ഹർജിയിൽ വ്യക്തമാക്കിയിരുന്നു. എന്നാൽ ഹര്‍ജി സുപ്രീം കോടതി തള്ളുകയായിരുന്നു.

'ഹൈക്കോടതിയുടെ ഒരു നല്ല ഉത്തരവായാണ് ഇതിനെ കാണുന്നത്. ഇതിൽ ഇടപെടാൻ ഒരു കാരണവും ഞങ്ങൾ കാണുന്നില്ല. എന്നാല്‍ ഈ നിരീക്ഷണങ്ങൾ ക്രിമിനൽ കേസുകളിലെ വിചാരണകളെ ബാധിക്കില്ലെന്നാണ് ഹർജി തള്ളിക്കൊണ്ട് ജസ്റ്റിസ് ബോബ്ഡെ വ്യക്തമാക്കിയത്.

പൗരത്വ നിയമ ഭേദഗതിക്കെതിരെ കഴിഞ്ഞ വർഷം അലിഗഡ് സര്‍വകലാശാലയിൽ സംഘടിപ്പിച്ച പരിപാടിയിൽ സാമുദായിക ഐക്യം തകർക്കുന്ന തരത്തിലുള്ള പ്രസംഗം നടത്തിയെന്നാരോപിച്ചാണ് കഫീൽ ഖാനെ അറസ്റ്റ് ചെയ്തത്.

സാമൂഹിക നിലയെ  അസ്വസ്ഥമാക്കുകയും അലിഗഡിലെ പൗരന്മാരിൽ ഭയത്തിന്റെയും അരക്ഷിതാവസ്ഥയുടെയും അന്തരീക്ഷം സൃഷ്ടിക്കുകയും ചെയ്തു എന്നാരോപിച്ചാണ് അദ്ദേഹത്തിനെതിരെ ദേശസുരക്ഷാനിയമ പ്രകാരവും കേസ് രജിസ്റ്റർ ചെയ്തത്.. 

എന്നാൽ യുപി സർക്കാരിന്‍റെ നടപടിക്കെതിരെ വ്യാപക പ്രതിഷേധം  ഉയർന്നിരുന്നു. പിന്നാലെയാണ് കഫീൽ ഖാന്‍റെ പ്രസംഗത്തിൽ വിദ്വേഷമോ സംഘർഷമോ ഉണ്ടാക്കുന്ന തരത്തിലുള്ള ഒരു പരാമർശവും ഉണ്ടായിട്ടില്ലെന്ന് വ്യക്തമാക്കി കോടതി അദ്ദേഹത്തെ മോചിപ്പിക്കാൻ ഉത്തരവിട്ടത്.

യു‌പി സർക്കാർ കുട്ടികളെപ്പോലെ ശാഠ്യം കാണിക്കുന്നുവെന്നാണ് ജയിൽ മോചിതനായ ശേഷം കഫീൽ ഖാൻ പറഞ്ഞത്. തന്നെ ഇനിയും എന്തെങ്കിലും കേസിൽ കുരുക്കി ജയിലിൽ ആക്കാനുള്ള സാധ്യത ഉണ്ടെന്നും അദ്ദേഹം ആരോപിച്ചിരുന്നു.