പകർപ്പവകാശ ലംഘനം; ആഭ്യന്തര മന്ത്രി അമിത് ഷായുടെ ഡിസ്പ്ലേ ചിത്രം നീക്കം ചെയ്ത് ട്വിറ്റർ; അല്‍പസമയത്തിന് ശേഷം പുനസ്ഥാപിച്ചു

ന്യൂഡൽഹി: ആഭ്യന്തര മന്ത്രി അമിത് ഷായുടെ ഡിസ്പ്ലേ ചിത്രം നീക്കം ചെയ്ത് ട്വിറ്റർ. കോപ്പി റൈറ്റ് ലംഘനം ചൂണ്ടിക്കാട്ടിയാണ് നടപടി. അൽപസമയത്തിനകം പുനഃസ്ഥാപിക്കുകയും ചെയ്തു. 'കോപ്പി റൈറ്റ് ഹോൾഡറിൽ നിന്ന് റിപ്പോർട്ട് ലഭിച്ച സാഹചര്യത്തിലാണ് ചിത്രം നീക്കം ചെയ്തതെന്നാണ് വിശദീകരണം.

കഴിഞ്ഞദിവസം വൈകിട്ടോടെയാണ് അമിത് ഷായുടെ വെരിഫൈഡ് ട്വിറ്റർ ഹാൻഡിലിൽ നിന്നും ഡിസ്പ്ലേ ചിത്രം അപ്രത്യക്ഷമായത്. ചിത്രത്തിൽ ക്ലിക്ക് ചെയ്താൽ ബ്ലാങ്ക് പേജായിരുന്നു കാണാൻ കഴിയുക. “Media not displayed. This image has been removed in response to a report from the copyright holder"എന്ന സന്ദേശവും ഉൾപ്പെട്ടിരുന്നു. 

എന്നാൽ അല്‍പസമയത്തിന് ശേഷം ചിത്രം വീണ്ടും പുനഃസ്ഥാപിക്കുകയും ചെയ്തു. മനപൂർവ്വമല്ലാത്ത അശ്രദ്ധ മൂലം ഉണ്ടായ പ്രശ്നമാണിതെന്നാണ് ട്വിറ്ററിന്‍റെ വിശദീകരണം.

 'മനപ്പൂര്‍വ്വമല്ലാത്ത ഒരു പിഴവ് മൂലം ഗ്ലോബൽ കോപ്പിറൈറ്റ് പോളിസിയുടെ ഭാഗമായി അക്കൗണ്ട് താത്ക്കാലികമായി ലോക്ക് ചെയ്തിരുന്നു. ആ തീരുമാനം വേഗം തന്നെ തിരുത്തുകയും ചെയ്തു. അക്കൗണ്ട് ഇപ്പോൾ പൂർണ്ണമായും പ്രവർത്തനക്ഷമമാണ്' എന്നാണ് ട്വിറ്റർ വക്താവ് നൽകിയ വിശദീകരണം.

കോപ്പി റൈറ്റ് ലംഘനം ചൂണ്ടിക്കാട്ടി നേരത്തെ ബിസിസിഐയുടെ ഡിസ്പ്ലേ ചിത്രവും ട്വിറ്റർ നീക്കം ചെയ്തിരുന്നു.