ബാരാമുള്ളയിൽ ഏറ്റുമുട്ടല്‍; രണ്ട് ലഷ്കർ ഭീകരരെ വധിച്ചു

ശ്രീനഗർ: ബാരാമുള്ളയിൽ സുരക്ഷ സേനയുമായുണ്ടായ ഏറ്റുമുട്ടലിൽ രണ്ട് ഭീകരർ കൊല്ലപ്പെട്ടു.

വ്യാഴാഴ്ചയാണ് ഏറ്റുമുട്ടൽ ഉണ്ടായത്. സോപോർ ഏരിയയിലെ ദംഗാർപോരയിലാണ് ഏറ്റുമുട്ടൽ ഉണ്ടായത്.

കൊല്ലപ്പെട്ട ഭീകരർ ലഷ്കർ ഇ തോയിബ അംഗങ്ങളാണ്. ഇവരുടെ മറ്റ് വിവരങ്ങളൊന്നും ലഭിച്ചിട്ടില്ല. മേഖലയിൽ സുരക്ഷ സേന തെരച്ചിൽ ശക്തമാക്കിയിട്ടുണ്ട്.

ഭീകരരുടെ സാന്നിധ്യമുണ്ടെന്ന വിവരങ്ങളെ തുടർന്നായിരുന്നു തെരച്ചിൽ നടത്തിയത്. രാഷ്ട്രീയ റൈഫിള്‍, പൊലീസിലെ പ്രത്യേക സംഘം, സിആർപിഎഫ് എന്നിവ സംയുക്തമായാണ് തെരച്ചിൽ നടത്തിയത്.

മേഖലയിൽ മൊബൈൽ ഇന്റർനെറ്റ് കണക്ഷൻ താത്കാലികമായി റദ്ദാക്കിയിട്ടുണ്ട്. മുൻകരുതലിന്‍റെ ഭാഗമായി വിദ്യാഭ്യാസ സ്ഥാപനങ്ങൾ അടച്ചിടാൻ നിർദേശം നൽകിയിട്ടുണ്ട്.