പ്രസവശസ്ത്രക്രിയ കഴിഞ്ഞപ്പോൾ ബില്ലടയ്ക്കാൻ പണമില്ല; നവജാത ശിശുവിനെ ആശുപത്രിക്ക് വിറ്റെന്ന് ദമ്പതികൾ

ആഗ്ര: പ്രസവ ശസ്ത്രക്രിയ കഴിഞ്ഞപ്പോൾ ബില്ലടയ്ക്കാൻ പണമില്ലാതിരുന്നതിനെ തുടർന്ന് നവജാത ശിശുവിനെ ആശുപത്രിയ്ക്ക് വിറ്റെന്ന് ദമ്പതികൾ.

ആശുപത്രി ആവശ്യപ്പെട്ടതനുസരിച്ചാണ് കുഞ്ഞിനെ വിറ്റതെന്നും ദമ്പതികൾ ആരോപിക്കുന്നു. ആഗ്ര ട്രാൻസ്-യമുനയിലെ ജെ.പി ആശുപത്രിക്കെതിരെയാണ് ദമ്പതിമാർ പരാതിയുമായി രംഗത്തെത്തിയിരിക്കുന്നത്.

റിക്ഷാ തൊഴിലാളിയായ ശിവ് ചരണിന്റെ ഭാര്യ ബബിത ഓഗസ്റ്റ് 24-ാം തീയതിയാണ് ആറാമത്തെ കുഞ്ഞിനെ പ്രസവിച്ചത്. സിസേറിയൻ നടത്തിയാണ് ഡോക്ടർമാർ ആൺകുഞ്ഞിനെ പുറത്തെടുത്തത്. 35,000 രൂപയായിരുന്നു ബിൽ.

ഇത് അടയ്ക്കാൻ നിവൃത്തിയില്ലാതെ വന്നതോടെ ഒരു ലക്ഷം രൂപയ്ക്ക് കുഞ്ഞിനെ വിറ്റ് ബിൽ അടയ്ക്കാനുള്ള തുക കണ്ടെത്താൻ ആശുപത്രി അധികൃതർ ആവശ്യപ്പെട്ടെന്നാണ് പരാതി. പണമില്ലാത്തതിനാൽ കുഞ്ഞിനെ ആശുപത്രിക്ക് വിറ്റെങ്കിലും ഇപ്പോൾ കുഞ്ഞിനെ തിരികെ വേണമെന്നാണ് ദമ്പതിമാരുടെ ആവശ്യം.

കുഞ്ഞിനെ കൈമാറിയതോടെ ഒരു രൂപ പോലും ബില്ലടയ്ക്കാൻ ആവശ്യപ്പെടാതെ ഡിസ്ചാർജ് ഷീറ്റ് പോലും നൽകാതെ ഇവരെ വിട്ടയക്കുകയായിരുന്നുവെന്ന് ശിവ് ചരൺ പറഞ്ഞു. എഴുത്തോ വായനയോ അറിയാത്തതിനാൽ ആശുപത്രി അധികൃതർ നൽകിയ പല കടലാസുകളിലും വിരലടയാളം പതിപ്പിച്ചിരുന്നതായും അദ്ദേഹം പറഞ്ഞു.

സാമ്പത്തികമായി ഏറെ പ്രയാസമനുഭവിക്കുന്ന കുടുംബമായിട്ടും ബബിതയ്ക്ക് സർക്കാരിൽനിന്ന് പ്രസവധനസഹായം ലഭിച്ചിരുന്നില്ല. ഗർഭകാലത്ത് ആശ വർക്കറോ മറ്റു ആരോഗ്യപ്രവർത്തകരോ സഹായിച്ചിരുന്നില്ലെന്നും ഇവർ പറഞ്ഞു.

ശംഭു നഗറിലെ വാടക വീട്ടിലാണ് ശിവ് ചരണും ഭാര്യയും അഞ്ച് മക്കളും താമസിക്കുന്നത്. ഇവരുടെ മൂത്തമകന് 18 വയസുണ്ട്. ഇയാൾ ഷൂ ഫാക്ടറിയിൽ ജോലി ചെയ്യുകയായിരുന്നു. കോവിഡ് ലോക്ക് ഡൗണിനെ തുടർന്ന് ജോലി നഷ്ടമായി.

അതേസമയം, ദമ്പതിമാരുടെ ആരോപണം തെറ്റാണെന്ന് ആശുപത്രി അധികൃതർ പ്രതികരിച്ചു. കുഞ്ഞിനെ വളർത്താൻ കഴിയാത്തതിനാൽ ദമ്പതിമാർ സ്വമേധയാ ആശുപത്രിക്ക് കൈമാറിയതാണെന്നും ഇതിന്റെ രേഖകളുണ്ടെന്നും ജെ.പി. ആശുപത്രി മാനേജർ സീമ ഗുപ്ത പറഞ്ഞു.

സംഭവം വിവാദമായതോടെ ജില്ലാ മജിസ്ട്രേറ്റ് അന്വേഷണത്തിന് ഉത്തരവിട്ടിട്ടുണ്ട്. ഇത് ഗുരുതരമായ കാര്യമാണെന്നും വിശദമായ അന്വേഷണം നടത്തുമെന്നും കുറ്റക്കാരാണെന്ന് കണ്ടെത്തിയാൽ അവർക്കെതിരെ ശക്തമായ നടപടി സ്വീകരിക്കുമെന്നും ജില്ലാ മജിസ്ട്രേറ്റ് പ്രഭു എൻ. സിങ് പറഞ്ഞു.