UP Elections 2022 Phase 4: യുപി നാലാംഘട്ട വോട്ടെടുപ്പ്: ഒൻപത് ജില്ലകളിലെ 59 മണ്ഡലങ്ങളിൽ വോട്ടെടുപ്പ് തുടങ്ങി

ലക്‌നൗ : യുപിയിൽ നാലംഘട്ട വോട്ടെടുപ്പ് തുടങ്ങി. ഫത്തേപൂർ, ബന്ദ, പിൽഭിത്, ഹർദോയ്, ഖേരി, ലക്‌നൗ, റായ്ബറേലി, സീതാപൂർ, ഉന്നാവോ എന്നീ ഒമ്പത് ജില്ലകളിലെ 59 നിയമസഭാ മണ്ഡലങ്ങളിലേക്കുള്ള വോട്ടെടുപ്പ് നടക്കുമ്പോൾ 624 സ്ഥാനാർത്ഥികളാണ് ജനവിധി തേടുന്നത്.  (Image: News18)

രാവിലെ 7 മുതൽ വോട്ടിംഗ് ആരംഭിച്ചു. 13,813 പോളിംഗ് സ്റ്റേഷനുകളിലും 24,580 പോളിംഗ് ബൂത്തുകളിലും വൈകുന്നേരം 6 വരെ മുൻകരുതൽ നടപടികളോടെ വോട്ടെടുപ്പ് നടക്കും. ബിജെപിക്ക് നിർണായകമായ സീറ്റുകളിലേക്കാണ് ഇന്ന് തെരഞ്ഞെടുപ്പ് നടക്കുന്നത്.  (Image: News18)

 2017 ലെ തെരഞ്ഞെടുപ്പിൽ 59 സീറ്റുകളിൽ 51 എണ്ണത്തിലും ബിജെപിയാണ് മുന്നേറിയത്. സംഘർഷ സാധ്യത നിലനിൽക്കുന്നതിനാൽ സംസ്ഥാന പൊലീസ് സുരക്ഷ ശക്തമാക്കിയിട്ടുണ്ട്. 60,000 ഉദ്യോഗസ്ഥരെയാണ് പോളിംഗ് നടക്കുന്ന ജില്ലകളിൽ വിന്യസിച്ചിരിക്കുന്നത്.  (Image: News18)

കര്‍ഷക രോഷത്തിന്റേയും ഭരണവിരുദ്ധ വികാരത്തിന്റേയും പശ്ചാത്തലത്തില്‍ ഇത്തവണ ഇതിന് വിപരീതമായ ഒരു അസസ്ഥയുണ്ടാകുമെന്നാണ് സമാജ്‌വാദി പാര്‍ട്ടി പറയുന്നത്. ഈ മണ്ഡലങ്ങളില്‍ ഒരു സീറ്റ് മാത്രമാണ് കഴിഞ്ഞ നിയമസഭാ തെരഞ്ഞെടുപ്പില്‍ സമാജ്‌വാദി പാര്‍ട്ടിക്ക് നേടാന്‍ സാധിച്ചത്.  (PTI Photo)

റഷ്യയും യുക്രൈനും തമ്മില്‍ നിലനില്‍ക്കുന്ന പ്രതിസന്ധികള്‍ക്കിടയില്‍, ലോകത്ത് സംഘര്‍ഷാവസ്ഥ നിലനില്‍ക്കുമ്പോള്‍, ഇന്ത്യ കൂടുതല്‍ ശക്തമാകണമെന്ന് പ്രധാനമന്ത്രി നരേന്ദ്ര മോദി ഇന്നലെ തെരഞ്ഞെടുപ്പ് പ്രചരണത്തിനിടെ ഉത്തര്‍പ്രദേശിലെ ജനങ്ങളോട് പറഞ്ഞിരുന്നു. ഉത്തര്‍പ്രദേശ് നിയമസഭാ തെരഞ്ഞെടുപ്പിന്റെ ഭാഗമായി ബഹ്‌റൈചില്‍ നടന്ന പൊതുറാലിയ്ക്കിടെയായിരുന്നു പ്രധാനമന്ത്രിയുടെ പ്രതികരണം. (Image: News18)

‘ലോകത്ത് എത്രമാത്രം സംഘര്‍ഷമാണ് നിലനില്‍ക്കുന്നതെന്ന് നിങ്ങള്‍ കാണുന്നുണ്ട്. പ്രയാസകരമായ സമയങ്ങളില്‍ രാജ്യത്തെ നയിക്കാന്‍ കരുത്തുള്ള ഒരു നേതാവ് വേണം. കൂടാതെ ഇന്ത്യയും മനുഷ്യരാശിയും കൂടുതല്‍ കരുത്തരാകേണ്ട സമയമാണ്. ഇന്ന് നിങ്ങളുടെ ഓരോ വോട്ടും ഇന്ത്യയെ ശക്തമാക്കും.’ ഇന്ത്യയെ കരുത്തുറ്റതാക്കാന്‍ യുപിയിലെ ഓരോ വോട്ടും പ്രയോജനപ്പെടുമെന്നും പ്രധാനമന്ത്രി പറയുകയായിരുന്നു. (Image: News18)

പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, അഖിലേഷ് യാദവ്, പ്രിയങ്കഗാന്ധി എന്നിവരടക്കമുള്ള പ്രമുഖ നേതാക്കള്‍ ഇന്ന് അഞ്ച്, ആറ് ഘട്ട തെരഞ്ഞെടുപ്പുകള്‍ നടക്കുന്ന സംസ്ഥാനത്തെ വിവിധ മണ്ഡലങ്ങളില്‍ പ്രചാരണ റാലികളുടെ ഭാഗമാകും.  (Image: News18)

ഏഴ് ഘട്ടങ്ങളിലായാണ് യുപിയിൽ ഇത്തവണ തെരഞ്ഞെടുപ്പ്. ഇതിൽ മൂന്ന് ഘട്ടങ്ങൾ അവസാനിച്ചു. ഫെബ്രുവരി പത്തിനാണ് യുപിയില്‍ തെരഞ്ഞെടുപ്പ് ആരംഭിച്ചത്. മാര്‍ച്ച് പത്തിന് വോട്ടെണ്ണല്‍ നടക്കും. (Image: News18)