'ഞാനെന്റെ ജോലി ചെയ്യുക മാത്രമാണുണ്ടായത്'; പ്രിയങ്കയെ കഴുത്തിന് പിടിച്ച് തള്ളിയെന്ന ആരോപണം തള്ളി ഉദ്യോഗസ്ഥ

ന്യൂഡൽഹി: പൗരത്വ നിയമ ഭേദഗതിക്കെതിരെ പ്രതിഷേധിച്ചതിന്റെ പേരിൽ അറസ്റ്റിലായ മുൻ ഐപിഎസ് ഓഫീസർ എസ്ആർ ദാരാപുരിയെ സന്ദർശിക്കാനെത്തിയ കോൺഗ്രസ് നേതാവ് പ്രിയങ്ക ഗാന്ധിയെ കൈയ്യേറ്റം ചെയ്തെന്ന ആരോപണം നിഷേധിച്ച് യുപി പൊലീസ് ഉദ്യോഗസ്ഥ.

മുൻകൂട്ടി നിശ്ചയിച്ചതിൽ നിന്ന് വ്യത്യസ്തമായി പ്രിയങ്ക വഴിമാറി സഞ്ചരിച്ചപ്പോൾ തടയുക മാത്രമാണ് ചെയ്തതെന്ന് പ്രിയങ്കയുടെ സുരക്ഷ ചുമതല ഉണ്ടായിരുന്ന അർച്ചന സിംഗ് വ്യക്തമാക്കി.

താൻ തന്റെ ജോലി ചെയ്യുക മാത്രമാണുണ്ടായതെന്ന് ഉന്നത പൊലീസ് ഉദ്യോഗസ്ഥർക്കും ജില്ലാ ഭരണകൂടത്തിനും നൽകിയ വിശദീകരണത്തിൽ അർച്ചന വ്യക്തമാക്കി.

പൊലീസ് ഉദ്യോഗസ്ഥർ പ്രിയങ്കയെ കഴുത്തിന് പിടിച്ച് തള്ളിയെന്ന ആരോപണങ്ങളിൽ കഴമ്പില്ലെന്ന് അർച്ചന വ്യക്തമാക്കിയിരിക്കുന്നു.

വാസ്തവത്തിൽ തന്നെയാണ് തള്ളിയതെന്നും താൻ നിലത്ത് വീഴുകയായിരുന്നുവെന്നും അർച്ചന പറയുന്നു.

ലഖ്നൗവിൽ വിവിധ സ്ഥലങ്ങളിൽ സന്ദർശനം നടത്താൻ പ്രിയങ്ക ഗാന്ധി തീരുമാനിച്ചിരുന്നു. അവർക്ക് അകമ്പടി സേവിക്കാനുളള ചുമതല എനിക്കായിരുന്നു. പാർട്ടി ഹെഡ്ക്വാർട്ടേഴ്സിൽ നിന്ന് ഗോഖലെ മാർഗിലുള്ള 23/2 കൗൾ ഹൗസിലേക്ക് പോകാനാണ് മുൻകൂട്ടി തീരുമാനിച്ചിരുന്നത്. അവരുടെ കാറിനെ ഞാൻ പിന്തുടർന്നു.

എന്നാൽ പെട്ടെന്ന് അവരുടെ കാർ വഴിമാറി യാത്ര ചെയ്തു. സുരക്ഷാ കാരണങ്ങളാൽ ലക്ഷ്യ സ്ഥാനത്തെ കുറിച്ച് കൃത്യമായ വിവരം നൽകാൻ ഞാൻ ആവശ്യപ്പെട്ടു. എന്നാൽ പ്രവർത്തകർ ഇത് വിസമ്മതിച്ചു. പ്രിയങ്ക പിന്നീട് കാറിൽ നിന്നിറങ്ങി പാർട്ടി പ്രവർത്തകർക്കൊപ്പം നടക്കാൻ ആരംഭിച്ചു.

വിഐപികൾ മുൻകൂട്ടി അറിയിക്കാതെ വഴിമാറ്റിയാൽ അത് ട്രാഫിക് സംവിധാനത്തെ ബാധിക്കും- വിശദീകരണ കുറിപ്പിൽ അർച്ചന വ്യക്തമാക്കുന്നു.

അതേസമയം അർച്ചനയെ പിന്തുണച്ച് നിരവധി പേർ സോഷ്യൽ മീഡിയയിൽ രംഗത്തെത്തിയിട്ടുണ്ട്. സ്റ്റാൻഡ് വിത്ത് അർച്ചന എന്ന ഹാഷ്ടാഗിലാണ് പലരും പിന്തുണ അറിയിച്ചിരിക്കുന്നത്.