മുംബൈ: തെരഞ്ഞെടുപ്പ് റാലിക്കിടെ ബിജെപി- കോൺഗ്രസ് പ്രവർത്തകർ തമ്മിൽ സംഘർഷം ഉണ്ടായ പശ്ചാത്തലത്തിൽ സുരക്ഷ ആവശ്യപ്പെട്ട് നടിയും സ്ഥാനാർഥിയുമായ ഊർമിള മദോന്ദ്കർ പൊലീസിനെ സമീപിച്ചു.
തിങ്കളാഴ്ചയാണ് ഊർമിള സുരക്ഷ ആവശ്യപ്പെട്ട് പൊലീസിനെ സമീപിച്ചത്. ബോറിവാലി റെയിൽവെ സ്റ്റേഷനിലെ തെരഞ്ഞെടുപ്പ് പ്രചാരണ പരിപാടിക്കിടെയാണ് സംഘർഷം ഉണ്ടായതെന്ന് പൊലീസ് വ്യക്തമാക്കി.
മുംബൈ നോർത്തിൽ നിന്നുള്ള കോൺഗ്രസ് സ്ഥാനാർഥിയാണ് ഊർമിള.സിറ്റിംഗ് എംപി ഗോപാൽ ഷെട്ടിട്ടിയാണ് മണ്ഡലത്തിലെ ബിജെപി സ്ഥാനാർഥി.
ബോറിവാലി സ്റ്റേഷനു പുറത്ത് ഊർമിളയുടെ പരിപാടിക്കിടെ ബിജെപി പ്രവർത്തകർ 'മോദി മോദി' എന്ന് മുദ്രാവാക്യം വിളിക്കുകയായിരുന്നു. കോൺഗ്രസ് പ്രവർത്തകർ ഇത് തടയാൻ ശ്രമിച്ചതോടെയാണ് സംഘർഷം ഉണ്ടായത്.
തന്റെ റാലിയിലേക്ക് ബിജെപി പ്രവര‍ത്തകർ തള്ളിക്കയറുകയായിരുന്നുവെന്ന് ഊർമിള പൊലീസിൽ നൽകിയ പരാതിയിൽ വ്യക്തമാക്കിയിരിക്കുന്നു .
പെരുമാറ്റ ചട്ടത്തിന്റെ പ്രകടമായ ലംഘനമാണിതെന്ന് അവര്‍ പറഞ്ഞു. ബിജെപി ഭയം സൃഷ്ടിക്കുകയാണെന്നും കോൺഗ്രസ് ആരോപിച്ചു. ജീവന് ഭീഷണിയുള്ളതിനാൽ സുരക്ഷ ആവശ്യപ്പെട്ടിച്ചുണ്ടെന്നും പരാതി നൽകിയിട്ടുണ്ടെന്നും ഊർമിള പറഞ്ഞു. ആദ്യമായിട്ടാണ് ഇത്തരത്തിൽ സംഘർഷം ഉണ്ടായതെന്നും അവർ പറഞ്ഞു.
തന്റെ റാലിയിലേക്ക് തള്ളിക്കയറി പ്രശ്നങ്ങള്‍ സൃഷ്ടിച്ചത് സാധാരണ ജനങ്ങളല്ല, ബിജെപിക്കാരാണെന്നും സാധാരണക്കാർ ഇങ്ങനെ ചെയ്യില്ലെന്നും ഊർമിള പറഞ്ഞു. റാലിയിൽ തള്ളിക്കയറിയവർ മോശം വാക്കുകൾ ഉപയോഗിച്ചും മോശമായ രീതിയിൽ നൃത്തം ചെയ്തെന്നും ഊർമിള .
സ്ത്രീകളെ പേടിപ്പിക്കാൻ വേണ്ടിയായിരുന്നെന്നും അവർ വ്യക്തമാക്കി. തെരഞ്ഞെടുപ്പ് കമ്മീഷനിലും പരാതി നൽകുമെന്നും അവർ പറഞ്ഞു. ഏപ്രിൽ 29ന് നടക്കുന്ന നാലാംഘട്ട പോളിംഗിലാണ് മുംബൈയിൽ വോട്ടെടുപ്പ്. കഴിഞ്ഞമാസമാണ് ഊർമിള കോൺഗ്രസിൽ ചേർന്നത്.
