COVID 19| കനിക കപൂറിനൊപ്പം അത്താഴ വിരുന്ന്; വസുന്ധര രാജെയും മകനും സ്വയം നിരീക്ഷണത്തിൽ

ജയ്പുര്‍: രാജസ്ഥാൻ മുൻമുഖ്യമന്ത്രി വസുന്ധര രാജെയും മകനും ബിജെപി എം.പിയുമായ ദുഷ്യന്ത് സിങും സ്വയം നിരീക്ഷണത്തില്‍. കൊറോണ ബാധിതയായ ഗായിക കനിക കപൂര്‍ പങ്കെടുത്ത അത്താഴ വിരുന്നിൽ പങ്കെടുത്തതിനെ തുടർന്നാണ് സ്വയം നിരീക്ഷണത്തിൽ കഴിയുന്നത്. വസുന്ധര രാജെയാണ് വെള്ളിയാഴ്ച ഇക്കാര്യം അറിയിച്ചത്.

തന്റെ കൊറോണ വൈറസ് പരിശോധനാഫലം പോസിറ്റീവാണെന്ന് ശനിയാഴ്ച സാമൂഹികമാധ്യമങ്ങളിലൂടെ കനിക അറിയിച്ചതിനു പിന്നാലെയാണ് വസുന്ധരയുടെയും മകന്റെയും നടപടി.

താനും മകനും സ്വയം നിരീക്ഷണത്തില്‍ കഴിയാന്‍ തീരുമാനിച്ചെന്നും എല്ലാ മുൻകരുതലുകളും സ്വീകരിച്ചിട്ടുണ്ടെന്നും വസുന്ധര ട്വിറ്ററിലൂടെ അറിയിച്ചു.

ലഖ്‌നൗവില്‍ ഞാനും മകനും അവന്റെ ഭാര്യയുടെ മാതാപിതാക്കളും ഒരു അത്താഴവിരുന്നില്‍ പങ്കെടുത്തിരുന്നു. കൊറോണ വൈറസ് പരിശോധനയില്‍ പോസിറ്റീവായ ഗായിക കനിക കപൂറും അതിഥിയായിരുന്നു.

പരിപാടിക്ക് ശേഷം ദുഷ്യന്ത് സിംഗ് പാർലമെന്റിലും എത്തിയിരുന്നു. മാർച്ച് 18ന് രാഷ്ട്രപതി ഭവനിൽ നടന്ന വിരുന്നിലും സിംഗ് പങ്കെടുത്തു.

പത്ത് ദിവസം മുമ്പാണ് കനിക കപൂർ ലണ്ടനിൽ നിന്ന് ഇന്തയിലെത്തിയത്. ഇൻസ്റ്റഗ്രാമിലെ നീണ്ട കുറിപ്പിലൂടെയാണ് കനിക കൊറോണ പരിശോധന ഫലം പോസിറ്റീവ് ആണെന്ന് അറിയിച്ചത്. നാല് ദിവസം മുമ്പാണ് പനിയുടെ ലക്ഷണങ്ങൾ തനിക്കുണ്ടായതെന്നും കനിക വ്യക്തമാക്കി.

ലഖ്‌നൗവിലെ കിങ് ജോര്‍ജ് മെഡിക്കല്‍ യൂണിവേഴ്‌സിറ്റിയിലാണ് കനിക ഇപ്പോഴുള്ളത്. ഇവിടെ ഐസൊലേഷന്‍ വാര്‍ഡിലാണ് കനിക.