Actor Vijay| വിജയ് യുടെ പേരിൽ രാഷ്ട്രീയ പാർട്ടി ഇനി ഇല്ല; വിജയ് മക്കൾ ഇയക്കം പിരിച്ചു വിട്ടതായി പിതാവ് ചന്ദ്രശേഖർ കോടതിയിൽ

ചെന്നൈ: നടൻ വിജയിയുടെ പേരിൽ രൂപീകരിച്ച രാഷ്ട്രീയ പാർട്ടി വിജയ് മക്കൾ ഇയക്കം പിരിച്ചു വിട്ടതായി നടന്റെ പിതാവ്. ചെന്നൈ സിവിൽ കോടതിയിൽ വിജയിയുടെ അച്ഛൻ എസ്എ ചന്ദ്രശേഖർ സമർപ്പിച്ച സത്യവാങ്മൂലത്തിലാണ് പാർട്ടി പിരിച്ചു വിട്ടതായി അറിയിച്ചിരിക്കുന്നത്.

2021 ഫെബ്രുവരി 28ന് മുൻകൂട്ടി അറിയിച്ചത് പ്രകാരം വിജയ് മക്കൾ ഇയക്കത്തിലെ എല്ലാ അംഗങ്ങളേയും വിളിച്ചു വരുത്തി ജനറൽ ബോഡി യോഗം ചേർന്നുവെന്നും ഈ യോഗത്തിൽ പാർട്ടി പിരിച്ചുവിടാൻ തീരുമാനിച്ചതായുമാണ് സത്യവാങ്മൂലത്തിൽ പറയുന്നത്.

മാതാപിതാക്കൾ ഉൾപ്പെടെ പതിനൊന്ന് പേർക്കെതിരെ വിജയ് കോടതിയെ സമീപിച്ചതിന് പിന്നാലെയാണ് പുതിയ നീക്കം ഉണ്ടായിരിക്കുന്നത്.

മാതാപിതാക്കൾ ഉൾപ്പെടെ ഹർജിയിൽ പറഞ്ഞിരിക്കുന്ന പതിനൊന്ന് പേർ തന്റെ പേരിൽ രാഷ്ട്രീയ പാർട്ടി രൂപീകരിക്കുന്നതിനും പ്രചരണങ്ങൾക്കും ആളുകളെ സംഘടിപ്പിക്കുന്നതും വിലക്കണമെന്നാവശ്യപ്പെട്ടായിരുന്നു വിജയ് കോടതിയെ സമീപിച്ചത്.

പാർട്ടി പിരിച്ചുവിട്ടതിന് പിന്നാലെ, വിജയിയുടെ ഹർജിയിൽ പറയുന്ന വിജയ് മക്കൾ ഇയക്കത്തിന്റെ ഭാരവാഹികളായ പത്ത് പേരും രാജിക്കത്ത് നൽകിയതായും എസ്എ ചന്ദ്രശേഖർ കോടതിയെ അറിയിച്ചു.

വിജയ് മക്കൾ ഇയക്കം ഇനി ഇല്ലെന്നും തങ്ങളാരും ഇതിൽ അംഗങ്ങളല്ലെന്നും വ്യക്തമാക്കിയ സത്യവാങ്മൂലത്തിൽ നടൻ വിജയിയുടെ ആരാധകരായി തങ്ങൾ തുടരുമെന്നും എസ്എ ചന്ദ്രശേഖർ സത്യവാങ്മൂലത്തിൽ പറയുന്നു.

2020 ലാണ് വിജയ് മക്കൾ ഇയക്കം എന്ന രാഷ്ട്രീയ പാർട്ടി എസ്എ ചന്ദ്രശേഖർ രൂപീകരിച്ചത്. തെരഞ്ഞെടുപ്പ് കമ്മീഷനിലും ഇതേ പേരിൽ രജിസ്റ്റർ ചെയ്തിരുന്നു. എന്നാൽ ഇതിനു പിന്നാലെ വിജയും രംഗത്തെത്തി. പിതാവ് രജിസ്റ്റർ ചെയ്ത രാഷ്ട്രീയ പാർട്ടിയുമായി തനിക്ക് യാതൊരു ബന്ധവുമില്ലെന്നും ആരാധകർ ഈ പാർട്ടിയുമായി സഹകരിക്കരുതെന്നും താരം വ്യക്തമാക്കി.

തന്റേ പേരോ ചിത്രങ്ങളോ രാഷ്ട്രീയ പ്രചരണത്തിന് ഉപയോഗിക്കരുതെന്നും അദ്ദേഹം വ്യക്താക്കിയിരുന്നു. ഇതിനെതിരെ പ്രവർത്തിക്കുന്നവർക്കെതിരെ നിയമനടപടി സ്വീകരിക്കുമെന്നും വിജയ് പുറത്തിറക്കിയ പ്രസ്താവനയിൽ പറഞ്ഞിരുന്നു.