കനയ്യയ്ക്കെതിരായ രാജ്യദ്രോഹ കേസ്; എ.എ.പിയെ വിമർശിച്ച് സംഗീത സംവിധായകൻ വിശാൽ ദാദ്‌ലാനി

ന്യൂഡൽഹി: കനയ്യകുമാറിനെതിരെ ഡൽഹി പൊലീസ് രജിസ്റ്റർ ചെയ്ത രാജ്യദ്രോഹ കേസിൽ പ്രോസിക്യൂഷന് അനുമതി നൽകിയ ആംആദ്മി പാർട്ടി സർക്കാരിനെതിരെ ഗായകനും സംഗീത സംവിധായകനുമായ വിശാൽ ദാദ്‌ലാനി.

"സർക്കാരുകളുടെ തെറ്റായ നടപടികളിൽ പ്രതിഷേധമുള്ളവർ ചേർന്നാണ് എഎപി എന്ന പാർട്ടിക്ക് തുടക്കമിട്ടത്. അണികളിൽ ഭൂരഭാഗവും ഇപ്പോഴും അത്തരക്കാരാണ്. പക്ഷം നമ്മളിൽ ചിലർ ഇപ്പോൾ വലിയ അപകടത്തിലാണ്" - വിശാൽ ട്വീറ്റ് ചെയ്തു.

2016-ൽ രജിസ്റ്റർ ചെയ്ത കേസിൽ ജെ.എൻ.യു വിദ്യാർഥി യൂണിയൻ പ്രസിഡന്റായിരുന്ന കനയ്യ കുമാർ, ഉമർ ഖാലിദ്, അനിർബൻ ഭട്ടാചാര്യ, മുജീബ് ഗട്ടൂ, ഖാലിദ് ഭട്ട്, മുൻ ജാമിയ മിലിയ ഇസ്ലാമിയ വിദ്യാർത്ഥികളായ ഉമൈർ ഗുൽ, പത്രപ്രവർത്തകൻ ബഷരത് അലി എന്നിവരെ പ്രോസിക്യൂട്ട് ചെയ്യാനാണ് എഎപി സർക്കാർ അനുമതി നൽകിയിരിക്കുന്നത്.

2016 ഫെബ്രുവരി 9 ന് ജെ.എൻ.യു കാമ്പസിൽ നടന്ന പ്രകടനത്തിനിടെ രാജ്യദ്രോഹ മുദ്രാവാക്യങ്ങൾ വിളിച്ചെന്നാണ് പ്രതികൾക്കെതിരായ ആരോപണം.

ഡൽഹി നിയമസഭാ തെരഞ്ഞെടുപ്പിൽ ആംആദ്മി പാർട്ടിയുടെ പ്രചാരണത്തിനായി വിശാൽ ദാദ്‌ലാനി രംഗത്തിറിങ്ങിയിരുന്നു. ആം ആദ്മി പാർട്ടിയുടെ സ്റ്റാർ കാമ്പയിനർ പട്ടികയിലെ ഒരേയൊരു "സെലിബ്രിറ്റി" യായിരുന്നു വിശാൽ. മദിപൂർ, മോതി നഗർ, തിലക് നഗർ എന്നിവിടങ്ങളിൽ വിശാൽ റോഡ് ഷോ നടത്തുകയും ചെയ്തിരുന്നു.

രാജ്യദ്രോഹക്കേസിൽ കനയ്യ ഉൾപ്പെടെയുള്ളവർക്കെതിരെ 2019 ജനുവരി 14 ന് പൊലീസ് കുറ്റപത്രം സമർപ്പിച്ചിരുന്നു. എന്നാൽ പ്രോസിക്യൂഷന് അനുമതി നൽകാൻ കേജരിവാൾ സർക്കാർ ഒരു വർഷത്തോളം തയാറായിരുന്നില്ല. ഇതിനു പിന്നാലെയാണ് വെള്ളിയാഴ്ച അനുമതി നൽകിക്കൊണ്ടുള്ള ഉത്തരവ് പുറത്തിറങ്ങിയത്.

 കനയ്യ കുമാർ ഉൽപ്പെടെയുള്ളവരെ പ്രോസിക്യൂട്ട് ചെയ്യാൻ അനുമതി നൽകിയതിനെ വിമർശിച്ച് മുതിർന്ന കോൺഗ്രസ് നേതാവ് പി ചിദംബരവും ഡൽഹി സർക്കാരിനെ വിമർശിച്ച് രംഗത്തെത്തിയിട്ടുണ്ട്.