Assembly Election 2022| ആരു നേടും ഉത്തരാഖണ്ഡിന്റെ ദേവഭൂമി?

അഞ്ച് സംസ്ഥാനങ്ങളിലെ തെരഞ്ഞെടുപ്പ് ഫലം വരാൻ ഇനി മണിക്കൂറുകൾ മാത്രം. ബിജെപിയും കോണ്‍ഗ്രസുമടക്കം മുഖ്യധാരാ രാഷ്ട്രീയ പാര്‍ട്ടികള്‍ ഇഞ്ചോടിഞ്ച് പോരാട്ടം നടത്തിയ ഇവിടെ ഫലം പ്രവചനാതീതമാണ്. ഹരിദ്വാറും ഋഷികേശുമടക്കമുള്ള തീര്‍ത്ഥാടന കേന്ദ്രങ്ങളാല്‍ സമ്പന്നമായ ഇവിടം ദേവഭൂമിയെന്നാണ് അറിയപ്പെടുന്നത്. പക്ഷേ ഹിമാലയന്‍ മലനിരകളെ പോലെ തണുത്ത് ഉറഞ്ഞ് കിടക്കുകയല്ല ഉത്തരാഖണ്ഡിന്‍റെ രാഷ്ട്രീയ മനസ്. ആരാകും ഈ ദേവഭൂമിയുടെ അമരത്തേക്ക് കടന്നുവരിക.. അറിയാം ഉത്തരാഖണ്ഡിനെ കുറിച്ച്.

ഇന്ത്യുടെ ഇരുപത്തിയേഴാമത് സംസ്ഥാനമായി 2000 നവംബര്‍ 9നാണ് ഉത്തരാഖണ്ഡ് രൂപീകൃതമാകുന്നത്. 53,483 ചതുരശ്ര കിലോമീറ്റര്‍ പരന്നുകിടക്കുന്ന സംസ്ഥാനത്ത് 13 ജില്ലകളാണ് ഉള്ളത്. പതിനൊന്ന് കോടിയാണ് ആകെ ജനസംഖ്യ. തലസ്ഥാനം ഡെറാഡൂണ്‍. ഹിന്ദി, കുമൊണി, ഗഡ്വാളി എന്നിവയാണ് പ്രധാന ഭാഷകള്‍.

2017 ജുലൈ മുതല്‍ 2018 ജൂണ്‍ വരെ നടത്തിയ സര്‍വേ പ്രകാരം 87.6 ശതമാനമാണ് ഉത്തരാഖണ്ഡിലെ സാക്ഷരതാ നിരക്ക് . ഇന്ത്യയിലിത് 77.7 ശതമാനമാണ്.

ആകെ ജനസംഖ്യയിലെ 17.72 ശതമാനം പേരാണ് ഉത്തരാഖണ്ഡില്‍ ദരിദ്രരായിട്ടുള്ളത്. ഏറ്റവുമധികം ദരിദ്രരുള്ളത് അല്‍മോറാ ജില്ലയിലാണ്.

ഉത്തരാഖണ്ഡിലെ പിതോരാഗാഹ് ജില്ലയാണ് സംസ്ഥാനത്തെ ഏറ്റവും സമ്പന്നമായ പ്രദേശം (ദാരിദ്യം കുറവുള്ള ജില്ല). രുദ്രപ്രയാഗാണ് ഈ പട്ടികയില്‍ രണ്ടാം സ്ഥാനത്ത്.

സംസ്ഥാനത്തെ ആകെ ജനസംഖ്യയുടെ 32.85 ശതമാനവും പോഷകാഹാര കുറവ് നേരിടുന്നു. കൂടാതെ സംസ്ഥാനത്ത് 9.79 ശതമാനം പേരും ആറാം ക്ലാസ് വിദ്യാഭ്യാസം നേടാത്തവരാണ്.

ഉത്തരാഖണ്ഡിന്‍റെ പ്രതിശീർഷ ആഭ്യന്തര ഉൽപാദന നിരക്ക് (Per Capita NSDP) 158919 ആണ്.

ഉത്തരാഖണ്ഡില്‍ പാചകത്തിനായി കൂടുതൽ പേരും ഉപയോഗിക്കുന്നത് പരമ്പരാഗത മാര്‍ഗങ്ങളാണ്. എന്നാല്‍ കഴിഞ്ഞ കുറച്ച് വര്‍ഷങ്ങളായി ഈ കണക്കില്‍ കുറവ് വന്നിട്ടുണ്ട്. കണക്കുകള്‍ പ്രകാരം 21.20 ശതമാനം കുടുംബങ്ങളാണ് കൃത്യമായ ശുചീകരണ സംവിധാനങ്ങള്‍ ഇല്ലാത്തത്.

ശുദ്ധജലം ലഭിക്കാൻ 30 മിനിട്ടിലേറെ നടക്കേണ്ട അവസ്ഥ കഴിഞ്ഞ വർഷങ്ങളിൽ ഇല്ലാതാക്കാൻ കഴിഞ്ഞിട്ടുണ്ട്.. കൂടാതെ വൈദ്യുതി ഇല്ലാത്ത വീടുകളുടെ എണ്ണത്തിലും അടുത്ത കാലത്തായി വലിയ കുറവ് വന്നിട്ടുണ്ട്.

ഉത്തരാഖണ്ഡില്‍ ആയിരം പേരെ അടിസ്ഥാനമാക്കി തയ്യാറാക്കിയ കണക്ക് പരിശോധിച്ചാല്‍ ഗ്രാമപ്രദേശങ്ങളില്‍ 72 പേരും നഗരത്തില്‍ 134 പേരും തൊഴില്‍രഹിതരാണ്.

2017ലെ നിയമസഭാ തെരഞ്ഞെടുപ്പിലെ കക്ഷി നില ഇങ്ങനെയാണ്- ആകെയുള്ള 70 സീറ്റുകളില്‍ 57 സീറ്റും നേടിയത് ബിജെപിയാണ്. കോണ്‍ഗ്രസ് 11 സീറ്റും മറ്റുള്ളവര്‍ 2 സീറ്റും നേടിയിട്ടുണ്ട്.