എന്തുകൊണ്ട് ബിജെപി പ്രവർത്തകയെ വേഗം മോചിപ്പിച്ചില്ല? മമതയ്ക്ക് സുപ്രീം കോടതിയുടെ കോടതിയലക്ഷ്യ നോട്ടീസ്

ന്യൂഡൽഹി: പശ്ചിമ ബംഗാളിലെ മമത ബാനർജി സർക്കാരിന് സുപ്രീം കോടതിയുടെ കോടതിയലക്ഷ്യ നോട്ടീസ്. മമത ബാനർജിയുടെ മോർഫ് ചെയ്ത ചിത്രം പ്രചരിപ്പിച്ചതിന് അറസ്റ്റ് ചെയ്ത ബിജെപി പ്രവർത്തക പ്രിയങ്ക ശർമ്മയെ സുപ്രീം കോടതി നിർദേശം ഉണ്ടായിട്ടും മോചിപ്പിച്ചില്ലെന്ന പരാതിയിലാണ് നടപടി. സുപ്രീം കോടതി അയച്ച കോടതിയലക്ഷ്യ നോട്ടീസിന് നാലു ആഴ്ചകൾക്കകം മറുപടി നൽകാനാണ് നിർദേശം.

കോടതിയലക്ഷ്യം ആരോപിച്ചു പ്രിയങ്ക ശർമ്മയുടെ സഹോദരനാണ് സുപ്രിംകോടതിയെ സമീപിച്ചത്. സുപ്രീം കോടതി നിർദേശിച്ചു രണ്ട് ദിവസത്തിന് ശേഷമായിരുന്നു പ്രിയങ്ക ശർമയെ പോലീസ് മോചിപ്പിച്ചത്.

നടി പ്രിയങ്ക ചോപ്ര ന്യൂയോർക്കിൽ പങ്കെടുത്ത ഒരു പരിപാടിയുടെ ചിത്രം ഉപയോഗിച്ചാണ് മമതയുടെ ഫോട്ടോ പ്രിയങ്ക ശർമ മോർഫ് ചെയ്തു ഫേസ്ബുക്കിലൂടെ പ്രചരിപ്പിച്ചത്. ഇതേത്തുടർന്ന് ബംഗാൾ പൊലീസ് പ്രിയങ്ക ശർമയെ അറസ്റ്റ് ചെയ്യുകയായിരുന്നു.

എന്നാൽ പ്രിയങ്കയെ അറസ്റ്റ് ചെയ്ത നടപടി പ്രഥമ ദൃഷ്ട്യാ തെറ്റായിരുന്നുവെന്ന് സുപ്രീം കോടതി നിരീക്ഷിച്ചിരുന്നു. ഉടൻ പ്രിയങ്കയെ മോചിപ്പിക്കണമെന്നും കോടതി ഉത്തരവിട്ടു. കോടതി ഉത്തരവ് ഉണ്ടായിട്ടും രണ്ടുദിവസത്തിനുശേഷമാണ് പ്രിയങ്ക ശർമയെ പൊലീസ് വിട്ടയച്ചത്.