'കശ്മീർ മുക്തി, ദളിത് മുക്തി, മുസ്ലിം മുക്തി' പ്ലക്കാർഡുമായി പ്രതിഷേധം; യുവതി കസ്റ്റഡിയിൽ

ബംഗളൂരു: പൗരത്വ നിയമത്തിനെതിരായ പ്രതിഷേധത്തിനിടെ പാക് അനുകൂല മുദ്രാവാക്യം വിളിച്ച സംഭവത്തിനു പിന്നാലെ കശ്മീർ മുക്തി, ദളിത് മുക്തി, മുസ്ലിം മുക്തി പ്ലക്കാർഡുമായി പ്രതിഷേധിച്ച യുവതിയെ പൊലീസ് കസ്റ്റഡിയിലെടുത്തു.

ബംഗളൂരുവിൽ വെള്ളിയാഴ്ചയാണ് സംഭവം. പാക് അനുകൂല മുദ്രാവാക്യം വിളിച്ച അമൂല്യ ലിയോണക്കെതിരെ സംഘടിപ്പിച്ച പ്രതിഷേധ പരിപാടിയിലാണ് യുവതി ഇത്തരത്തിലൊരു പ്ലക്കാർഡുമായി പ്രതിഷേധിച്ചത്.

ആരുദ്ര എന്ന യുവതിയെയാണ് കസ്റ്റഡിയിലെടുത്തിരിക്കുന്നത്. വിവിധ വിഭാഗങ്ങൾക്കിടയിൽ ശത്രുത സൃഷ്ടിക്കുന്നതടക്കമുള്ള ഇന്ത്യൻ ശിക്ഷ നിയമത്തിലെ വകുപ്പുകൾ ചുമത്തി ഇവർക്കെതിരെ കേസെടുത്തിട്ടുണ്ട്.

ഹിന്ദു ജാഗരണ്‍ വേദി സംഘടിപ്പിച്ച പ്രതിഷേധ പരിപാടിയില്‍ പങ്കെടുത്തവര്‍ക്കിടയില്‍ പ്ലക്കാർഡുമായി ഇവര്‍ ഇരിക്കുകയായിരുന്നു. പ്രതിഷേധക്കാർ അവരോട് പോകാൻ ആവശ്യപ്പെട്ടതോടെ ജനക്കൂട്ടം ഒത്തുകൂടിയതായി സിറ്റി പൊലീസ് മേധാവി ഭാസ്‌കർ റാവു പറഞ്ഞു. തുടർന്നാണ് അവരെ അവിടെ നിന്ന് മാറ്റിയതെന്നും അദ്ദേഹം വ്യക്തമാക്കി.

പ്ലക്കാർഡിനൊപ്പം അവരെയും കസ്റ്റഡിയിലെടുത്തു. അവരുടെ സുരക്ഷയ്ക്കായിട്ടാണ് അങ്ങനെ ചെയ്തത്. അവരുടെ പശ്ചാത്തലം, എവിടെ നിന്നാണ് വന്നത്, പിന്നിൽ മറ്റാരെങ്കിലും ഉണ്ടോ തുടങ്ങിയ കാര്യങ്ങൾ അന്വേഷിക്കും-റാവു മാധ്യമപ്രവർത്തകരോട് പറഞ്ഞു. മറ്റ് മുദ്രാവാക്യങ്ങളൊന്നും തന്നെ അവർ മുഴക്കിയിരുന്നില്ലെന്നും അദ്ദേഹം പറഞ്ഞു.'കശ്മീർ മുക്തി, ദളിത് മുക്തി, മുസ്ലിം മുക്തി' എന്ന് കന്നഡയിലും ഇംഗ്ലീഷിലുമാണ് പ്ലക്കാർഡിൽ എഴുതിയിരുന്നത്.

നേരത്തെ പൗരത്വ നിയമ ഭേദഗതിക്കെതിരായ പരിപാടിക്കിടെയാണ് അമൂല്യ പാക് അനുകൂല മുദ്രാവാക്യം വിളിച്ചത്. ഇവർക്കെതിരെ രാജ്യദ്രോഹ കുറ്റം ചുമത്തി.എഐഎംഐഎം നേതാവും എംപിയുമായ അസദുദീന്‍ ഒവൈസി പങ്കെടുത്ത പരിപാടിക്കിടെയിലായിരുന്നു സംഭവം.

മൂന്നുവട്ടം പാക് അനുകൂല മുദ്രാവാക്യം വിളിച്ച പെണ്‍കുട്ടിയെ ഒവൈസി അടക്കമുള്ളവര്‍ തിരുത്താന്‍ ശ്രമിക്കുകയും അവരുടെ കൈയില്‍നിന്ന് മൈക്ക് പിടിച്ചുവാങ്ങുകയും ചെയ്തിരുന്നു.