COVID 19 | ബിഗ് ബോസ് താരത്തിന് സ്വീകരണം: 13 പേർ അറസ്റ്റിൽ; രജിത് കുമാറും അറസ്റ്റിലായേക്കും

കോവിഡ് മുന്നറിയിപ്പ് അവഗണിച്ച് റിയാലിറ്റി ഷോ താരം ഡോ. രജിത് കുമാറിന് നെടുമ്പാശേരി വിമാനത്താവളത്തിൽ സ്വീകരണം നൽകിയ സംഭവത്തിൽ 13 പേർ അറസ്റ്റിലായി. ഒളിവിൽ കഴിയുന്ന റിയാൽറ്റി ഷോ താരം രജിത് കുമാറും വൈകാതെ അറസ്റ്റിലാകുമെന്നാണ് സൂചന. പൊലീസിന് മുന്നിൽ കീഴടങ്ങാനും സാധ്യതയുണ്ട്.

സോണി തോമസ് കറുകുറ്റി , ഫരീറുദ്ദിൻ പെരുമ്പാവൂർ, ബിനു പാലാരിവട്ടം, ക്രിസ്റ്റി ജോൺ പറവൂർ, കിരൺ ജോൺ പറവൂർ, അനിൽ കുമാർ മുപ്പത്തടം, വിപിൻ കൊല്ലം, പെരുമ്പാവൂർ സ്വദേശികളായ നിബാസ്, മുഹമ്മദ് അഫ്സൽ എന്നിവരെ നേരത്തെ അറസ്റ്റ് ചെയ്തിരുന്നു. രജിത് കുമാർ ഒളിവിലാണെന്നും പൊലീസ് വ്യക്തമാക്കിയിരുന്നു.

ബിഗ് ബോസിൽനിന്ന് പുറത്തായശേഷം നെടുമ്പാശേരിയിലെത്തിയ രജിത് കുമാറിന് സ്വീകരണമൊരുക്കാൻ ഞായറാഴ്ച രാത്രി വൻജനക്കൂട്ടം തടിച്ചുകൂടിയ സംഭവത്തിൽ എൺപതോളംപേർക്കെതിരെയാണ് കേസെടുത്തത്. പേരറിയാവുന്ന നാലുപേർക്കെതിരെയും കണ്ടാലറിയാവുന്ന മറ്റ് 75 പേർക്കെതിരെയുമാണ് നിയമലംഘനത്തിന് കേസെടുത്തതെന്ന് കളക്ടർ വ്യക്തമാക്കി.

കോവിഡ് 19 വ്യാപനം ആശങ്കാജനകമാകുന്നതിനിടെയാണ് കഴിഞ്ഞദിവസം രജിത് കുമാറിന് സ്വീകരണമൊരുക്കാൻ വൻജനക്കൂട്ടം നെടുമ്പാശേരിയിൽ തടിച്ചുകൂടിയത്. രജിത് എത്തുന്ന വിവരം അറിഞ്ഞ് മണിക്കൂറുകൾക്ക് മുമ്പ് തന്നെ വൻ ജനക്കൂട്ടം വിമാനത്താവളത്തിന് പുറത്ത് തടിച്ചുകൂടിയിരുന്നു. ഇവരെ നിയന്ത്രിക്കാൻ പൊലീസ് നന്നേ പണിപ്പെട്ടു.

കോവിഡ് 19 പശ്ചാത്തലത്തിൽ ലോകം മുഴുവൻ ജാഗ്രതയിൽ നിൽകുമ്പോൾ ഒരു TV ഷോയിലെ മത്സരാർഥിയും ഫാൻസ്‌ അസോസിയേഷനും ചേർന്ന് കൊച്ചി എയർപോർട്ട് പരിസരത്തു നടത്തിയ പ്രകടനങ്ങൾ അക്ഷരാർഥത്തിൽ ഓരോ മലയാളിയെയും നാണിപ്പിക്കുന്നതാണെന്ന് കളക്ടർ ഫേസ്ബുക്ക് പോസ്റ്റിൽ പറഞ്ഞു.

ജാഗ്രതയുടെ ഭാഗമായി മത-രാഷ്ട്രീയ- സാമുദായിക സംഘടനങ്ങൾ പോലും എല്ലാ വിധ സംഗം ചേർന്ന പ്രവർത്തനങ്ങളും ഉപേക്ഷിച്ചു ജനങളുടെ സുരക്ഷക്കായി നിലകൊള്ളുമ്പോൾ ഇങ്ങനെയുള്ള നിയമലംഘനങ്ങൾക്കു മുൻപിൽ കണ്ണടക്കാൻ നിയമപാലകർക്കു കഴിയില്ലെന്നും എറണാകുളം കളക്ടർ വ്യക്തമാക്കി.

മനുഷ്യ ജീവനെക്കാളും വില താരാരാധനക്കു കല്പിക്കുന്ന സ്വഭാവം മലയാളിക്കില്ലെന്നും ഇങ്ങനെ ചില ആളുകൾ നടത്തുന്ന കാര്യങ്ങൾ കേരള സമൂഹത്തിനു തന്നെ ലോകത്തിന്റെ മുൻപിൽ അവമതിപ്പുണ്ടാക്കാൻ കാരണമാകുമെന്നും കളക്ടർ ചൂണ്ടിക്കാട്ടിയിരുന്നു.